LAUTÉM, 08 juñu 2022 (TATOLI)—Peskadór, Modisto Marques, hateten, bainhira sira halo atividade hanesan tula ema ho bero hosi Valu bá vizita iha illa Jaco, kada loron sira bele hetan entre $50 to’o $100.
“Ami-nia servisu mak tun tasi buka ikan, aleinde ne’e tula mós ema bainhira husu ami lori sira ho ami-nia bero ba Jaco, loron ida ema bele to’o 10, dala ruma mós ema ida ka rua de’it,” Peskadór relata ba Agência Tatoli, iha Valu, postu administrativu Tutuala, munisípiu Lautém.
Notísia relevante: Tinan oin, SEP planeia sosa ró peska hamutuk 110
Tutuala-oan ne’e dehan, vizitante sira ne’e barak liu hanesan ema estranjeiru.
“Malae mak babain mai barak, sira barak mak mai iha loron sábadu no domingu, timor-oan mós iha maibé ladun, tanba ne’e mak ami hetan osan depende ba vizitante sira,” nia akresenta.
Atividade tula vizitante vizita illa Jaco ne’e hala’o desde tinan 2006 to’o agora.
“Ami iha ró kiik rasik, maibé antes ne’e Governu fó apoiu ró boot. Ami iha grupu kooperativa ne’ebé kuandu ema barak uza ró boot no osan tau hamutuk kada fulan-tolu mak ami fahe malu. Ami hamutuk na’in-14, bainhira ami fahe osan kada ema hetan de’it $50 tanba ami barak,” nia konta tuir.
Mane ho idade 40 ne’e informa, sira-nia atividade loron-loron mak hein ema bainhira husu ajuda entaun sira hetan osan, kuandu laiha maka sira ba buka osan hodi utiliza sosa fali kombustível, selu oan nia eskola no ba nesesidade família.
“Ha’u sente kontente tebes ho ha’u-nia serbisu maski dalaruma ladun hetan osan maibé atu halo oinsá serbisu mak nune’e, kuandu ita la serbisu la hetan osan,” nia tenik.
Tuir oráriu ne’ebé iha maka, sira hahú tula vizitante ba illa Jaco hahú dadeer tuku 09:00 otl to’o lokraik, ne’ebé kada ema selu $10, la eziste selu kada grupu.
Jornalista : Antónia Gusmão
Editora : Julia Chatarina