DILI, 12 juñu 2022 (TATOLI)—Polísia Nasional Timor-Leste (PNTL) hamutuk ho sarani Parokia Motael, domingu ne’e, selebra loron Santu António Padua nu’udar padruiru, ne’ebé halo atividade prosesaun hosi Kuartél PNTL Caicoli to’o igreja Motael no ikus taka ho misa.
Iha biban ne’e, Arsebispu Akidioseze Metropolitana Dili, Don Virgílio do Carmo da Silva, konsidera ohin loron importante tebes ba sarani Timor-Leste, tanba tinan-rua iha situasaun pandemia COVID-19, la selebra loron ne’e, maibé ohin bele selebra, tanba ne’e husu ba membru Polísia ne’ebé lori Santu António nu’udar mahein, hodi servisu tuir lei no orden ne’ebé hakerek iha diviza.
“Ohin PNTL mai hamutuk ho sarani Motael hodi selebra loron Santu António, tanba Santu António nu’udar mahein ba PNTL no Parókia Motael, nune’e ha’u husu PNTL nu’udar seguransa ba rai ida-ne’e atu servisu tuir lei no orden ne’ebé iha, sai hanesan masin ne’ebé naroman ba ema hotu, tuir leitura São João nian ne’ebé hateten nu’udar ita ema moris hadomi malu, liuliu hadomi maun alin sira ho hahalok no servisu ne’ebé imi hala’o” Don Virgílio hateten liuhosi nia omília bainhira prezide misa iha igreja Motael.
Notísia relevante: Governu halo reestruturasaun orgánika PNTL
Nia dehan, ohin loron nu’udar loron ne’ebé sarani sira haksolok hamutuk hodi hato’o sentimentu agradesimentu ba Maromak ne’ebé fó ona mahein Santu António ne’ebé bali sarani sira iha momentu hotu, liuliu iha momentu ne’ebé hotu-hotu presiza nia tulun.
“Ohin loron Santu António, tanba ne’e husu atu agradese ba Maromak ne’ebé fó ona mahein Santu António hodi kuidadu ita iha momentu ne’ebé de’it, nu’udar sarani Santu António nia domin ba ita mak husu foin-sa’e sira nu’udar joven atu hatene nia dever no kontribui dame ba rai ida-ne’e, respeita ambiente liuhosi soe lixu iha fatin, no nu’udar oan rona saida mak inan-aman ko’alia no ba inan-aman atu hadomi oan no kuda domin iha uma-laran hanorin oan sira ho liafuan edukativu,” Amu Bispu fó hanoin.
Selebrasaun misa ne’e, iha mós krismante na’in-700 resin ne’ebé simu sakramentu krisma.
“Ha’u husu alin sira ne’ebé ohin simu sakramentu krisma, liuhosi lilin ne’ebé iha imi-nia liman, hodi sunu no hatudu katak Jesus Kristu nia roman dame atu tama iha imi-nia moris. Hahú ohin imi hanesan lori instrumentu dame hodi kuda iha fuan no roman ne’ebé imi sei lori iha moris nian, nune’e hadomi no respeita imi-nia isin nu’udar Maromak illas,” nia tenik.
Jornalista : Arminda Fonseca
Editora : Julia Chatarina
