Maiu, PNTL Dili arrekada reseita $32,500.71 ba kofre Estadu

DILI, 15 juñu 2021 (TATOLI)— Polísia Nasionál Timor Leste (PNTL) munisípiu Dili, konsege arrekada reseita $32,500.71 hodi hatama ba konfre Estadu, iha fulan maiu.
Osan hirak-ne’e PNTL Dili rekolla liu hosi atividade operasaun no pasa revista ba movimentu transporte públiku ne’ebé kontra regra tránzitu hodi pasa billete ba infratór no apreensaun ba sasán evidénsia motorizada-sira.
Notísia relevante: Operasaun kalan, Polísia Tránzitu Dili halo apreensaun ba motór 101
Komandante Polísia munisípiu Dili, Superintendente Xefe, Henrique da Costa, esplika infratór hirak-ne’e konsidera viola regra ka kódigu Estrada.
“Ita nia operasaun ne’ebé maka Komandu Munisipiu Dili iha hosi pasa-revista bá transporte liu liu bá motorizada konsege rekolla reseita ba kofre Estadu hamutuk $32,5000.71,” Superintendente Xefe, Henrique da Costa hateten ba jornalista-sira iha Komandu PNTL Caicoli, tersa ne’e.
Operasaun ka pasa revista hala’o hosi hosi Eskuadra Dom-Aleixo, Vera-Cruz, Nain-Feto, Cristo-Rei inklui Eskudara Metinaro iha tempu kalan bá dokumentu motorizada, karreta inklui arma branka.
Komandu PNTL Dili alerta ba públiku bainhira kondús karreta ka motór tenki lori nafatin dokumentu kompletu, tanba PNTL kontinua implementa lei kódigu kontrola movimentu transporte.
Entretantu, Komandante Polisia Nasionál Timor-Leste (PNTL) Munisipiu Dili, Superintendente Xefe, Henrique da Costa, relata totál númeru asidente trafégu iha fulan maiu hamutuk 103, hosi númeru ne’e ema nain-rua maka lakon vida.
Notísia relevante: Janeiru too abríl, PNTL rekolla reseita $188,307
Jornalista: Natalino Costa
Editór : Florencio Miranda Ximenes

