DILI, 16 juñu 2022 (TATOLI)–Ministru Edukasaun Juventude no Desportu (MEJD), Armindo Maia, kuarta ne’e, halo aprezentasaun ida iha ámbitu reuniaun Konsellu Ministru (KM) kona-ba roteiru rekrutamentu ba profesór sira.
“Konsellu Ministru apresia ona aprezentasaun ida kona-ba prosesu no roteiru ba rekrutamentu profesór sira,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.
Notísia relevante: MEJD hein konkluzaun re-verifikasaun profesór kontratadu 5.203 hodi determina estatutu
Portavóz Governu dehan, aprezentasaun ne’e inklui informasaun ruma kona-ba númeru profesór sira ne’ebé iha no previzaun kona-ba rekrutamentu iha tempu badak.
“Objetivu maka atu rekruta hirak ne’ebé daudaun hanesan profesor voluntáriu sira, maibé foin aprezentasaun de’it hodi rona ideia, medida sira ne’ebé atu foti kabe ba kompeténsia ne’ebé lei atribui ba Ministériu Edukasaun Juventude no Desportu rasik,” nia esplika.
MEJD iha fulan hirak ne’e hasoru dezafiu kona-ba situasaun ensinu, liliu relasiona ho rekusu umanu, presiza solusiona voluntáriu sira.
Seluk mak hirak ne’ebé ninia estatutu seidauk loos tanba problema anteriór, nune’e mós sira ne’ebé la’ós ona voluntáriu no sira hanesan kontratadu maibé atu normaliza sira-nia situasaun ne’e seidauk iha dalan finál.
“Entaun ho problema tolu ne’e maka ministériu koko hela atu fó solusaun hodi bele garante katak sistema edukasaun sei la para no kontinua sein problema,” Ministru subliña.
Jornalista : Antónia Gusmão
Editora : Julia Chatarina
