iklan

HEADLINE, NASIONÁL, SEGURANSA

UPF halo destruisaun ba manu madena ilegál

UPF halo destruisaun ba manu madena ilegál

UPF ho akompañamentu ekipa integradu halo destruisaun manu madena ilegál, iha Batugade. Imajen/MI

DILI, 25 juñu 2022 (TATOLI)—Unidade Patrullamentu Fronteira (UPF) akompaña hosi ekipa Autoridade Aduaneira (AA)/Alfandega no Kuarentena postu Batugade halo destruisaun ba manu madena sia, ne’ebé  komunidade hatama via dalan ilegál liuhosi área Mota-Ain, suku Batugade, postu administrativu Balibo, munisipiu Bobonaro.

Komandante UPF, Superintendente Polísia, Euclides Belo, hateten, Ministeriu Agrikultura no Peskas (MAP), iha fulan dezembru tinan kotuk ofisialmente halo ona lansamentu ba manu futu tipu madena hosi Indonézia atu limite importasaun ilegál no legaliza emprezáriu ne’ebé de’it bele hatama, maibé komunidade kontinua viola hodi hatama sein justifikasaun.

Notísa relevante: MAP: lansa importasaun manu-futu atu kombate hatama ilegál

“Komunidade ne’ebé kontinua halo importasaun ba kualker tipu animál liuhosi dalan ilegál hosi fronteira tenke asume responsabilidade hodi hatán ba justisa,” Komandante UPF informa liuhosi nota ne’ebé Agência Tatoli asesu, sábadu ne’e.

 Aleinde ne’e, Komandante UPF husu ba emprezáriu lokál sira atu labele utiliza komunidade iha área fronteira hodi atinje lukru boot ba interese pesoál.

“Governu hala’o papél hanesan órgaun reguladór hodi fasilita importasaun, maibé Polísia Nasionál Timor-Leste (PNTL) mós ejize kooperasaun ba empreza hodi hatama reseita ba kofre estadu liuhosi dalan formál tuir lei Kuarentena Timor-Leste nian, tanba ita lakoli manu sira ne’e nia finalidade ba fali komersiál ilegál nian,” nia klarifika.

Maski nune’e, nia apresia ba vontade ekipa integradu ne’ebé hala’o serbisu hamutuk hodi halo destruisaun ba manu madena.

“Ha’u hakarak agradese ba ekipa servisu integradu ne’ebé akompaña halo detruisaun ba manu futu ilegál sira no sai mós sasin katak evidénsia sira ne’e ofisialmente ita sunu ona, nune’e labele sai fali problema ba ita iha futuru, tanba ita hotu iha responsabilidade hanesan ekipa integradu iha ne’e,  atu asegura la’ós de’it ema maibé mós fó atensaun ba protesaun moras seluk hosi animál ne’ebé bele prejudika saúde publika,” Euclides Belo dehan.

Jornalista  : Natalino Costa

Editora      : Julia Chatarina

iklan
iklan

Leave a Reply

iklan
error: Content is protected !!