iklan

HEADLINE, JUSTISA, NASIONÁL

Tribunál aplika TIR ba arguidu kazu tráfiku umanu

Tribunál aplika TIR ba arguidu kazu tráfiku umanu

Tribunál Distritál Dili. Imajen/TATOLI

DILI, 26 juñu 2022 (TATOLI)- Tribunál Distritál Dili (TDD), domingu ne’e liuhosi interrogatóriu dahuluk aplika Termu Identidade Rezidénsia (TIR) ba arguidu na’in-tolu hanesan, MVT, HS no JG tanba komete kazu tráfiku umanu ne’ebé fasilita timor-oan sira ba serbisu Dubai.

Iha julgamentu interrogatóriu dahuluk ne’e, Juis prosesu rona tiha arguidu no parte hotu nia deklasaun, Tribunál Distritál Dili, liu hosi Juis prosesu Afonso Carmona, ne’ebé kaer kazu ba arguidu na’in-olu ne’e deside aplika Termu Identidade Rezidénsia (TIR) ba arguidu sira.

Hafoin julgamentu, Advogadu Privadu Pedro Aparício hateten, tribunál deside aplika TIR ba nia kliente sira.

“Hafoin Tribunál halo tiha primeira interrogatóriu ba ha’u- nia kliente sira, Tribunál deside aplika medida Termu Identidade Rezidénsia (TIR) ba sira (arguidu) na’in-tolu hotu kedas,” Advogadu Privadu ne’e informa ba jornalista sira iha TDD.

Nia dehan, razaun Tribunál aplika medida TIR ba arguidu sira sei iha segredu justisa.

“Ha’u labele koalia, razaun tanba sá tribunál aplika TIR, maibé ha’u atu la ko’alia katak ne’e segredu justisa ha’u labele ko’alia,” Pedro Aparício realsa.

Nia hatutan, perante medida TIR, arguidu na’in-tolu bele halo viazen ba li’ur, maibé antes loron 15 laran arguidu sira tenke informa uluk ba parte Ministériu Públiku.

Pedro Aparício mós husu ba nia kliente na’in-tolu bele halo fali serbisu hanesan bainbain.

“Husu ba komunidade sira tenke koopera ho arguidu sira, tanba sira-nia fundasaun dezenvolvimentu Timor-Leste, ne’e mós atu fasilita timor oan ba serbisu rai li’ur, sira laiha intensaun ruma, tanba husu,” nia fó-hanoin.

Antes ne’e, Ministériu Públiku akuza arguidu sira ho krime tráfiku umanu no krime organizadu ne’ebé prevista iha artigu 163 hosi kódigu penál Timor-Leste.

Audiénsia julgamentu ne’e prezide hosi Juiz Singulár Afonso Carmona, Ministeriu Públiku reprezenta Prokuradór Domingos Goveia no arguidu sira hetan asisténsia legál hosi Defensór Públiku Humberto Alves no Advogadu Privadu, Pedro Aparício.

Notísia relevante:Advogadu suspeitu tolu kazu tráfiku umanu husu aplika TIR

Jornalista: Natalino Costa

Editór: Evaristo Soares Martins

iklan
iklan

Leave a Reply

iklan
error: Content is protected !!