iklan

HEADLINE, JUSTISA

Fundasaun Mahein apresia serbisu PCIC detein suspeitu ba kazu tráfiku umanu

Fundasaun Mahein apresia serbisu PCIC detein suspeitu ba kazu tráfiku umanu

PCIC detein sidadaun estranjeiru na’in-rua ne’ebé deskonfia envolve iha rede prátika tráfiku umanu no fasilita ilegál traballadora timoroan na’in-hitu (7), ne’ebé daudaun “terus” iha Dubai, Uni Emiradu Árabe.Imajen/espesiál.

DILI, 27 juñu 2022 (TATOLI)— Fundasaun Mahein (FM) apresia ba serbisu Polísia Siéntifiku Investigasaun Kriminál (PCIC, sigla Portugés), tanba konsege detein suspeitu sira, ne’ebé envolve krime tráfiku umanu no fasilita no trata ilegál dokumentu timoroan sira atu ba serbisu iha diáspora.

“Ami apresia sebisu PCIC nian durante ne’e, tanba liuhosi serbisu ne’ebé maka iha bele detein rede krime tráfiku umanu nain-tolu iha ita nian rai. Nune’e mós halo detensaun ba sidadaun estranjeiru nain-rua ne’ebé sai hanesan sindikatu internasionál ba krime tráfiku umanu,” Jestór Prinsipál Fundasaun Mahein, Abél Amaral, hateten ba Agência TATOLI iha kna’ar-fatin Audian, segunda ne’e.

Notísia relevante:  PCIC detein suspeitu nain-tolu ba kazu tráfiku umanu

Fundasaun Mahein nota durante ne’e PCIC halo nia serbisu di’ak tebes liuhosi sira nian serbisu informasaun intelijénsia nian, mezmu iha kritika no lamentasaun barak.

“Krime tráfiku umanu ne’e, krimi ne’ebé ita hotu lakohi atu akontese iha ita nia rai, piór liur krime ida ne’e rasik envolve ita nia ema hodi fasilita timoroan ba serbisu ba iha rai li’ur. Maibé ho grasa maromak nian, liuhosi ita nian serbisu informasaun PCIC nian (intelejénsia) konsege deteta lalais de’it suspeitu ne’ebé halo transasaun ba ita nia ema,” nia afirma.

Durante ne’e, nia dehan orgaun polisiál kriminál sira hanesan Polisia Nasionál Serbisu Investigasaun Kriminál (PNSIK) no PCIC tuir de’it mandadu hosi tribunal hodi detein suspeitu atu kumpri oras 72, hafoin submete suspeitu sira ba interrogatóriu dahuluk iha tribunál.

Nune’e, FM husu ba públiku atu fó nafatin konfiansa bá orgaun polisiál sira hodi kontinua halo nia serbisu.

“Atu dehan faktu la komprova ka komprova ne’e la’ós serbisu intelejénsia PCIC, maibé ne’e desizaun tribunál nian liuliu Juis sira maka tetu no deside,” nia afirma.

Notísia relevante:  PCIC detein sidadaun estranjeiru na’in-rua ba kazu tráfiku

Iha fatin ketak, Diretora Ezekutiva Programa Monitorizasaun Sistema Judisiál (JSMP, sigla Inglés), Ana Paula Marçal husu ba Tribunál atu aplika medida koasaun prizaun preventiva ba sidadaun estranjeiru nain-rua ne’ebé deskonfia envolve iha krime tráfiku umanu.

“Sidadaun estrajeiru nain-rua bainhira submete ba primeiru interrogatóriu presiza aplika medida koasaun prizaun preventiva, hodibele proteje sira labele halai sai hosi territóriu nasionál, maibé depende ba desizaun Tribunál,” Diretora Ezekutiva ne’e sujere.

Resposavél ne’e mós konsidera desizaun ba Tribunál Distritál Dili (TDD) ne’ebé aplika Termu Identidade Rezidénsia (TIR) ba suspeitu nain-tolu ne’ebé maka envolve kazu krime tráfiku ne’e desizaun nesesariu.

Tanba, arguidu sira nu’udar timoroan ne’ebé sei koopera ho justisa hodi hatan ba sala ne’ebé sira-komete bainhira de’it tribunál presiza.

Notísia relevante:  Tribunál aplika TIR ba arguidu kazu tráfiku umanu

Jornalista: Natalino Costa

Editór      : Florencio Miranda Ximenes 

iklan
iklan

Leave a Reply

iklan
error: Content is protected !!