iklan

EKONOMIA, HEADLINE

Estudante UNTL no IOB eleitu sai embaixadór turizmu relijiozu

Estudante UNTL no IOB eleitu sai embaixadór turizmu relijiozu

Enkaregadu Negósiu Embaixada EUA no reprezentante USAID, Zema Semunegus, entrega trofeiu ba Embaixadór Turizmu Relijiozu eleitu ba 2022-2023, Gerson João Filipe Ximenes, iha salaun Otél Timor, tersa (27/06). Imajen Tatoli/Francisco Sony

DILI, 28 juñu 2022 (TATOLI)–Governu liuhosi Ministériu Turizmu, Komérsiu no Indústria (MTKI) ho kolaborasaun Asosiasaun Turizmu Relijiozu no hetan apoia hosi United States Agency for International Development (USAID) hili estudante universitáriu na’in-rua sai embaixadór turizmu relijiozu tinan 2022-2023 ka Turizmu ba Ema Hotu (TBEH).

Embaixadór no Embaixadora Turizmu Relijiozu eleitu ba 2022-2023, simu trofeu iha salaun Otél Timor, tersa (27/06). Imajen Tatoli/Francisco Sony

Estudante rua ne’e mak hanesan Elisa Joana Gusmão ho idade 21 hosi Fakuldade Ekonomia, Departamentu komérsiu no Turizmu iha Universidade Nasionál Timor-Lorosa’e (UNTL) ne’ebé daudaun semestre VII no Gerson João Filipe Ximenes ho idade 28 hosi Fakuldade Ekonomia no Negósiu, Departamentu Akuntabilidade iha Institute of Bussiness (IOB) ne’ebé daudaun semestre III.

Enkaregadu Negósiu Embaixada Estadu Unidu Amérika (EUA) no reprezentante USAID, Zema Semunegus, konsidera atividade ne’e importante.

“Ba ha’u turizmu relijiozu sei fó kontribuisaun ba kofre Estadu no hamenus dependénsia ba fundu petróleu,” Zema Semunegus dehan iha Otél Timor, tersa ne’e.

Notísia relevante: Igreja Prontu Koopera ho MTKI Dezenvolve Turizmu Relijiozu

Vise-Ministra Turizmu Komunitária no Kulturál, Inácia da Conceicão Teixeira, tau kaebauk ba Embaixadora Turizmu Relijiozu eleitu ba 2022-2023, Elisa Joana Gusmão, iha salaun Otél Timor, tersa (27/06). Imajen Tatoli/Francisco Sony

Hafoin anúnsia, Vise-Ministra Turizmu Komunitáriu no Kultura, Inácia da Conceição Teixeira, no Diretór Ezekutivu Servisu Apoiu Sosiedade Sivil, Auditoria Sosiedade Sivil no Auditoria Sosiál hosi Gabinete Primeiru-Ministru (SASCAS-PM), Edvin  Duarte Soares Noronha, oferese tais, sertifikadu, pasta no trofeu.

Nune’e, Embaixadór eleitu asina kontratu hodi serbisu hamutuk ho Asosiasaun Turizmu Relijiozu hodi kria ideia prinsipál sira molok halo promosaun ba turizmu relijiozu no seluk tan.

Biban ne’e, Embaxadora Turizmu Relijiozu eleitu, Elisa Joana Gusmão, hateten, Timor-Leste iha sítiu turíztiku barak maibé seidauk iha promosaun ho di’ak.

“Ezemplu iha ha’u-nia rai rasik Baguia, ho inisiativa ida-ne’e, ha’u hakarak kompete ba Embaxadora Turizmu nian, ho tema ba diskursu públiku ne’ebé ha’u halo mak Uniaun no Diversidade atu Promove Turizmu Relijiozu iha Timor-Leste,” nia dehan.

Prezidente Asosiasaun Tuirmsu Relijiouzu Timor-Leste (ATR-TL), Padre Ângelo Salsinha, tau kaebauk ba Embaixadór Turizmu Relijiozu eleitu ba 2022-2023, Gerson João Filipe Ximenes, iha salaun Otél Timor, tersa (27/06). Imajen Tatoli/Francisco Sony

Nune’e mós, Embaixadór Turizmu Relijiozu eleitu, Gerson João Filipe Ximenes, konsidera, manán ka lakon tenki kompete.

“Ha’u tuir ida-ne’e tanba ho idade joven ita tenki tama iha kompetisaun no ita labele hein de’it ema mai hasoru, ita mós hasoru ema no buka apreende rasik hosi atividade hotu ne’ebé ita hala’o atu eleva abilidade no koñesimentu hodi dezenvolve ita-nia rain no ita sai manán-na’in. Ne’e la’ós apreende halo de’it diskursu maibé oinsá hatene serbisu hamutuk iha ekipa tanba ba oin ita sei hasoru ema foun no buat ne’ebé ita la hatene ikus mai ita bele hatene,” Gerson otimista.

Kritéria ne’ebé estudante sira submete hodi konkorre iha programa ne’e mak Kurrikulum Vitae (CV) no diskursu hard copy no soft copy hosi email, ho data admisaun hosi loron 04 to’o 05 juñu tinan 2022, hafoin ekipa halo selesaun ba konkorrente sira hosi tama iha top 10.

Aprezentasaun dansa kultura hosi Grupu Timor Furak, iha ámbitu anúnsia rezultadu manan-na’in Embaixadór no Embaixadora Turizmu Relijiozu eleitu ba 2022-2023 hosi Asosiaun Turizmu Relijiozu Timor-Leste, iha salaun Otél Timor, tersa (27/06). Imajen Tatoli/Francisco Sony

Iha loron 17 maiu 2022, hosi top 10 sira aprezenta diskursu ho tema ‘Uniaun no Diversidade Atu Promove Turizmu Relijiozu iha Timor-Leste’ iha Timor Plaza no iha 28 juñu anunsia rezultadu.

Universidade ne’ebé kompete kompostu hosi UNTL, IOB, Universidade Orientál (UNITAL), no Institutu Superiór Filozofia no Teolojia (ISFT).

Atividade ne’e hala’o ba datoluk ona tanba hahú kedan iha tinan 2019 bainhira Asosiasaun Turizmu Relijiozu Timor-Leste serbisu hamutuk ho MTKI no atividade ne’e ho objetivu atu promove sítiu no área turístiku, liuliu área turístiku relijiozu iha Timor-Leste.

Aprezentasaun dansa kultura iha ámbitu anúnsia rezultadu manan-na’in Embaixadór no Embaixadora Turizmu Relijiozu eleitu ba 2022-2023 hosi Asosiaun Turizmu Relijiozu Timor-Leste, iha salaun Otél Timor, tersa (27/06). Imajen Tatoli/Francisco Sony

Apoiu orsamentu hosi parte Governu liuhosi Fundu Dezenvolvimentu Apoiu Sosieade Sivil ho montante $110.000.

Atividade ne’e inisia hosi USAID Tourism for All serbisu hamutuk ho Asosiasaun Turizmu Relijiozu hodi fahe informasaun ba kada universidade sira iha Dili laran, ne’ebé hanesan atividade anuál ba kada tinan.

Eventu ne’e partisipa hosi Koordenadór SASCAS, Filipe da Costa, Prezidente Asosiasaun Turizmu, Relijiozu Timor-Leste (ATRTL), Madre Guilhermina Marçal no líder relijiozu seluk hosi relijiaun Hinduizmu, Budaizmu, Protentatizmu, Islamizmu, katolisizmu iha Timor-Leste mak hanesan, inklui estudante.

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!