iklan

DILI, EDUKASAUN, HEADLINE

SJB fasilita formasaun ba joven sira hodi kompete iha kampu traballu

SJB fasilita formasaun ba joven sira hodi kompete iha kampu traballu

Xefe Interinu ba Sentru Juventude Becora, Flavio Sebastião da Costa. Imajen/Hortencio Sanchez

DILI, 30 juñu 2022 (TATOLI)— Xefe Sentru Juventude Becora (SJB), Flavio Sebastião da Costa, hateten durante ne’e fasilita atividade formasaun iha área lian-inglés, komputadór báziku, IT no data base hodi hasa’e esprénsia joven-sira kompete iha kampu traballu.

“Ita halo atividade formasaun ne’e la’o ona durante fulan-tolu. Ita agora komesa simu ona rejistrasaun foun ba joven-sira,” Xefe SJB ne’e hateten ba Agência TATOLI iha nia knar-fatin Becora Dili, foin lalais ne’e.

Nia dehan, durante formasaun gratuita no rezistrasaun da-huluk mak ho osan $5, nune’e bele prodús sira nia sertifikadu bainhira formasaun ramata.

“Atividade extra ne’ebé ami hala’o liga ba atividade seluk mak hanesan edukasaun sivika liga ba saude produtiva no mos formasaun kona-ba Leadership, planu negósiu, jestaun organizasaun atividade sira ne’e mak durante hala’o hela iha Sentru Juventude Becora,” nia afirma.

Nia hatutan, “Ami tenke simu ema na’in-25 tanba períodu dahuluk estudante na’in- 25. Kuandu sira ramata hakarak voluntáriu iha ne’e bele atu hanorin fali joven foun ne’ebé hakarak mai aprende iha fatin ne’e”.

Durante ne’e, SJB loke oportunidade ne’e joven barak mak hakarak atu tuir formasaun hirak ne’e, maibé tanba menus rekursu no fasilidade hanesan komputadór no seluk tan mak sira deside simu de’it ema na’in-25 kada períodu.

Daudaun ne’e, joven ne’ebé servisu permanente iha SJB hamutuk na’in-haat ne’ebé mak ajuda mós fó formasaun voluntáriu ba joven sira.  Enkuantu formasaun ne’e, hahú kedan iha 2019 too agora no joven barak mak susesu ona bainhira ramata formasaun.

“Sira ne’ebé durante tuir treinamentu iha ne’e númeru mak ami ladun hatene mais kalkulasaun ami nian besik 200, maibé sira balun mak hetan ona servisu iha iha Banku Nasionál Komersiu Timor-Leste (BNCTL-sigla Portugés) no kompaña OKA, iha otél área ospitalidade, balun servisu ona iha Pateo no balun servisu iha kompaña Rui Castro nian,” nia afirma.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!