BAUCAU, EDUKASAUN, HEADLINE, MUNISÍPIU

Projetu konstrusaun no reabilitasaun eskolár iha Baucau atinje 25%

Projetu konstrusaun no reabilitasaun eskolár iha Baucau atinje 25%

Diretór Servisu Munisipál Edukasaun Baucau, Augusto Ornai Ximenes. Imajen Tatoli/Natalino Belo.

BAUCAU, 01 jullu 2022 (TATOLI) – Progresu Konstrusaun no Rehabilitasaun Ekolár (PKRE) ne’ebé finansia hosi Ministériu Edukasaun, Juventude no Desportu (MEJD) hamutuk 29 iha munisípiu Baucau atinje 25%.

Edukasaun Munisípiu Baucau hato’o ona relatóriu kona-ba progresu serbisu ba diresaun nasionál MEJD nian, maibé seidauk iha despaxu hosi Ajénsia Dezenvolvimentu Nasionál (ADN) atu halo transferénsia faze daruak 25% nian.

“Hosi 29 projetu ne’e, 25 nia progresaun hotu-hotu atinje 25% ba leten ona, hela de’it eskola tolu maka sei seidauk hahú,” Diretór Servisu Munisipál Edukasaun Baucau, Augosto Ornai Ximenes, ko’alia iha Vila Nova, sesta ne’e.

Hosi 29 projetu ne’e iha eskola haat mak seidauk hahú implementa PKRE tanba kondisaun estrada no iklima difikulta transporta matérial konstrusaun ba fatin projetu, maske orsamentu 25% transfere ona ba konta bankária.

Eskola haat refere komposta hosi Ensinu Báziku Filiál (EBF) Osso-Ufulari iha postu administrativu Baguia, EBF Ossolia, EBF Aboliri iha postu Quelicai no EBF Lalabu, iha postu administrativu Laga.

Hosi projetu 29, eskola EBF Katólika Darenafa, postu Quelicai no Ensinu Báziku Sentrál Osso-huna, postu Baguia halo reabilitasaun, 27 seluk halo konstrusaun foun tanba kondisaun eskola grave.

“Kuandu osan sai lalais, grupu konstrusaun sira finaliza projetu tuir tempu, maibé prosesu besik semana-rua ona, signifika badaen para tanba hein materiál konstrusaun,” Augosto Ximenes akresenta.

Projetu konstrusaun no reabilitasaun eskolár (PKRE) finansia hosi Ministériu Edukasaun, Juventude no Desportu (MEJD) ne’ebé hala’o kontratu ho diretór eskolár sira liuhosi Servisu Edukasaun Munisípal ho totál orsamentu ba munisípiu Baucau $3.001.683,69.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!