iklan

EDUKASAUN, HEADLINE, MUNISÍPIU

“Tatamane” hosi Ermera “buka moris” faan Tais to’o Baucau

“Tatamane” hosi Ermera “buka moris” faan Tais to’o Baucau

Negosiante Tais, Tomas Gonçalves

“Ami haruka imi ba eskola ne’e, hanesan to’os ami fahe ba imi. Kuidadu aan, serbisu, para aban bainrua, terus be ami nian ne’e labele akontese tan…”

VEMASE, 01 jullu 2022 (TATOLI)- Liman karuk kaer-metin hela Tais lubuk ida ne’ebé subar iha hena kór azul lalehan, leba iha kalilik no muda tais ne’e ba kotuk-laran la’o neineik ba oin. Liman-loos kaer ai-tonka haforsa nia ain-loos, la’o kudeik neineik hakat ho kuidadu la’o ba iha luron-boot.

Fuuk sira be buras iha ulun leten ne’e, loron ba loron monu halo ulun ne’e nabilan hanesan lalenok. Ulun-fatuk hahú molik. Matan mós ‘malahuk’. Ren-to’os namkurut. Kbiit naton, tuir otas-nakaras. Nia la’o uza ain-karuk de’it. Ain-loos kbiit laiha tanba kona kartus iha invazaun Indonézia. Tiru kona iha kidan loos borus to’o kidan karuk, maske kanek laiha ona maibé nakfila ona ba ‘sofrimentu’ naruk ida.

Negosiante Tais, Tomas Gonçalves

Ne’e mak kondisaun fízika, Tomas Gonçalves (tinan 72) husi munisípiu Ermera, postu-administrativu Atsabe, Suku Atara, Aldeia Tapoabe. Tuir dalen Mambae, ema mane ne’ebé otas nakaras ona baibain bolu “Tatamane” ka “Avó mane”.

“Monu iha embuskada mak ema tiru. Tiru iha ne’e (loos) sai fali sorin (karuk). Ne’ebé, la’o la di’ak” Tomas Gonçalves vítima funu ida informa ba Tatoli iha Baucau bainhira fa’an hela Tais, foin lalais ne’e.

Husi Viqueque mai Baucau no atu liubá Manatuto, fa’an Tais, iha nia ‘otas-nakaras” buka-moris. Antes liubá Manatuto, ho bus tuun iha Caravela, Vemase, Baucau.

Ho Tais lubuk ida, Defisiente ain, Tomas Gonçalves nego nia Tais ho nia folin ba komunidade Caravela sira, iha dadeer (tuku 11h53) ne’e.

“Bom dia. Hola Tais? “Avó Tomas Gonçalves kumprimentu no husu.

Ne’e, hira-hira mak ne’e? Komunidade André de Sá husu.

“Balun $35. Balun $30”.

“Iha boot no iha ki’ik. Tais Atsabe nian”

“Tais di’ak nian. Bele fase, tinta lasai” Vítima funu, Tomas Gonçalves nu’udar negosiante Tais esplika.

“Di’ak. Ita han meiu-dia lai mak ko’alia no haree fali Tais”

“Tais mesak furak duni”.

“Di’ak” Tomas Gonçalves hatán-badak de’it.

Tuirmai, hola tiha Tais, André de Sá, hanesan mós uma-na’in alende ko’alia kona-ba Tais, sira rua husu malu. Afinál, sira rua eis-militár portugés hotu. Tomas Gonçalves nu’udar Seksaun infantária depois ba fali Cavalaria Nú. 06 Atabae (Bobonaro) no André de Sá Seksaun infantária, iha Ermera. Istória naruk, kona-ba sira rua nia ‘nostalgia’ bainhira militár portugés ativu, kona-ba invazaun: terus, susar no sakrifísiu durante funu no to’o mai ukun rasik aan.

“Estadu fó buat ruma mai, fó. La fó mai mós la buat ida. Luta uluk, la iha ema ida promete buat ruma atu luta ba ita-nia rain. Ita mak hakarak. Ikusmai (ukun rasik aan) Estadu hakarak fó-netik buat ruma mai, selu oan sira ba Eskola,” Avó Tomas Gonçalves hateten iha dada-lia ho jornalista TATOLI molok fahe-malu. Jornalista Tatoli fila mai Dili. Avó negosiante Tais Atsabe, la’o kontinua ba Manatuto.

Iha meiu-dia, loromatan nia roman la konsege leno-borus kalohan-metan iha dadeer ne’e (11h53). Ai-tahan sira baku ba mai tuir anin huu malirin neineik, ‘hamaluk’ dada-lia (entrevista). Ho iis ‘nanotak’, iha otas-nakaras nian, komunidade Atsabe ne’e, hatutan katak nia fa’an Tais hodi tulun oan no beioan sira.

“Se ita la la’o buka osan selu oan sira-nia eskola, se mak fó?” nia preokupa.

Avó Tomas haktuir, bainhira sai tiha ‘liman-kro’at’ portugés nian no iha périodu okupasaun, hafoin invazaun militár Indonézia iha loron 7 dezembru 1975, nia hatutan moris ho fa’an Tais Atsabe hodi sustenta moris to’o ohin loron maske ho kondisaun defisiente. Defisiénsia iha ain tanba hetan tiru iha funu-laran.

“La’o fa’an Tais, iha Lautem, Viqueque (Dilor, Uma-tolu, Luca, Buicari, Ossu), Baucau no Manatuto. Kalan, hetan maluk (timoroan) sira toba iha ne’e, depois loron mak la’o fali,” Negosiante ‘otas nakaras’ konta tuir nia ain-le’ut.

“Ha’u fa’an Tais ne’e ba oan, beioan sira,” nia hatutan.

Tanba ansi atu kontinua ba fa’an Tais Atsabe, iha entrevista halo komparasaun katak uluk hakarak eskola faru la iha, kalsa la iha, sinelus la iha. Agora, buat hotu iha di’ak liu eskola.

“Uluk ami hein mak karau. Roupa la iha atu eskola. Buat ida la iha. Situasaun araska. Ikus fali mai, situasaun di’ak ba imi”.

Dook ka besik la sai razaun ba Avó Tomas Gonçalves. Kbiit liman no ain hahú ‘nanotak’ hatudu iha kada hakat ne’ebé iha, iha otas nakaras nian, tan buka moris iha loron no kalan.

“Ami haruka imi ba eskola ne’e, hanesan to’os ami fahe ba imi. Kuidadu aan, serbisu, para aban bainrua, terus be ami nian ne’e labele akontese tan,” Avó Tomas Gonçalves, defisiénsia ain, konsekuénsia husi funu, fó-hanoin.

“Oan, lisensa. Hanesan ne’e de’it ona,” Negosiante Tais despede no la’o daudaun.

Nune’e, ho ai-tonka hodi satan ain loos, liman-karuk kaer hena falun nakonu ho Tais, tau iha kotuk-laran hakat neineik ba oin, to’o lakon iha matan nia fihir tan ‘kbiit distánsia’ nian iha orizonte.

Notísia relevante:Loron ‘Santa’ iha Caravela

Jornalista : Rafy Belo

Editór      : Cancio Ximenes

iklan
iklan

Leave a Reply

iklan
error: Content is protected !!