DILI, 02 jullu 2022 (TATOLI)— Polisia Nasionál Timor-Leste (PNTL), liuhosi Komandu Munisipiu Dili, halo operasaun “la’o ain” no halo pasa revita ba motororizada no arma branka atu garante seguransa ba komunidade iha tempu kalan.
Operasaun la’o ain no atividade pasa revista ba motorizada no arma branka ne’e, Komandu Munisipiu PNTL Dili halo iha, sesta (01/07), kalan, hahú hosi tuku 20:00 to’o 23:30 otl, ne’ebé lideradu hosi Xefe Operasaun Komandu Munisípiu PNTL Dili, Inspektór Xefe, Delfin da Silva.
Operasaun la’o ain ne’e fahe ba parte rua hanesan, grupu membru PNTL balun halo iha parte hosi Aitarak-laran to’o Caicoli no segundu PNTL halo iha área Manleuna to’o ponte Comoro II nian.
Enkuantu, pasa revista ba motorizada no arma branka hosi membru Unidade Tránzitu hala’o iha Diresaun Caicoli liuliu edifísiu CNE nia oin-Matadadoro no parte Hotel-Timor nian.
Xefe Operasaun Komandu Munisipiu PNTL Dili, Inspetór Xefe, Delfin da Silva, hateten, Operasaun la’o ain ne’e ho nia objetivu atu garantia vizibilidade polisia iha komunidade nian le’et.
“Tanba dala barak ema hateten katak bainhira mosu problema iha tempu kalan sein presenza hosi polisia, tanba ne’e maka ita halo operasaun iha tempu kalan ne’e, atu komunidade sira sente polisia nia presenza iha duni ba sira,” Xefe Operasaun Komandu Munisipiu PNTL Dili, Inspetór Xefe, Delfin da Silva, hateten ba jornalista sira iha área Manleuna, sesta horikalan.
Iha operasaun la’o ain kalan ne’e tama sai bairru sira ne’ebé maka durante ne’e polisia identifika hanesan área risku ba konflitu.
“Ita garante seguransa ba sira atu ema hotu la’o livre iha tempu-kalan sein presaun. Ita fó hanoin joven sira labele barullu iha bairru laran, respeita ema seluk nian direitu deskasa iha tempu kalan,” nia hatutan.
Enkuantu, operasaun pasa revista (check point) ba motorizada sira no arma branka konsege halo apreensaun ba motirizada 40-resin tanba laiha karta kodusaun, la lori dokumentu, dokumentu mate, laiha asesoria hanesan espellu no la monta xápa matríkula.
Jornalista: Natalino Costa
Editór : Florencio Miranda Ximenes
