Deputadu FRETILIN husu MEJD kria baze dadus ba profesór
DILI, 05 jullu 2022 (TATOLI)—Deputadu bankada Frente Revolusionáriu Timor-Leste Independente (FRETILIN), Dário Madeira, husu ba Ministériu Edukasaun Juventude no Desportu (MEJD) atu kria baze dadus ida atubele identifika profesór permanente no kontratadu sira.
“Ami haree daudaun ne’e ministériu nia frakeza maka rezolve problema profesór sira, ne’ebé foin tun ba halo verifikasaun dadus iha terrenu,” Deputadu bankada Governu ne’e hateten iha sala plenária, Parlamentu Nasionál (PN), tersa ne’e
Nia dehan, Ministru sira troka malu lidera ministériu, maibé sira laiha planu atu halo mudansa ka preparasaun di’ak ba dezenvolvimentu edukasaun liuhosi apoiu baze dadus profesór sira, tanba ne’e maka daudaun ne’e mosu lista profesór adisionál barak maka tama iha MEJD.
“Ha’u husu ba MEJD atu halo verifikasaun ho di’ak, nune’e keta mosu lista favoretizmu iha prosesu nia laran no presiza kuidadu hodi haree didi’ak, tanba ema ne’ebé iha direitu atu hetan atensaun lalais hosi Governu maka sira ne’ebé hetan ona kontratu tinan barak ona maibé seidauk hetan direitu atu sai funsionáriu públiku,” nia akresenta.
Notísia relevante: MEJD promete sei aprezenta rekrutamentu profesór voluntáriu ba KM
Enkuantu, kona-ba asuntu profesór voluntáriu, Deputadu husu tenke halo identifikasaun loloos.
“Labele voluntáriu ne’ebé iha tempu atu halo rekrutamentu mak foin mosu mai ho dadus, tanba iha fatin balun profesór voluntáriu la hanorin iha de’it uma mós naran iha no fatin seluk profesór balun hanorin maibé naran laiha,” nia fó hanoin.
Nune’e mós, kona-ba asuntu projetu komunitáriu, Deputadu ne’e apresia planu no programa Governu no husu projetu atu kontinua nafatin, maibé MEJD tenke koordena ho ajénsia Dezenvolvimentu Nasionál (ADN) atubele haree didi’ak asuntu ne’e, tanba kestaun sira ne’ebé Deputadu sira foti iha sala plenária kona-ba problema konstrusaun eskola sira liuhosi projetu komunitáriu ne’e pertinente tebes.
“ADN tenke ko’a taxa ba Estadu, labele hanoin katak projetu komunitáriu komunidade ba halo gratuita de’it atu la ko’a taxa ba Estadu. Ha’u husu ba Ministru atu buka meiu ruma hodi tuur hamutuk ho ADN atu rezolve tiha asuntu ne’e ho didi’ak,” Deputadu salienta.
Aleinde ne’e, ADN ninia intervensaun hodi kontrola kualidade projetu, tanba ne’e presiza fasilidade adekuadu hosi kompañia ne’ebé kaer projetu ne’e atu labele mosu preokupasaun hanesan daudaun foti iha Parlamentu Nasionál.
Hatan ba kestaun baze dadus, Ministru Edukasaun Juventude no Desportu, Armindo Maia, konsidera baze dadus ba profesór voluntáriu sira pertinente, tanba ne’e MEJD iha ona planu hahú jullu to’o agostu tinan ne’e sei tuun filafali ba terrenu hodi halo re-verifikasaun ba dadus,
“Atu nune’e iha futuru labele hamosu profesór mate klamar iha prosesu rekrutamentu profesór voluntáriu sira. Ami sente ida-ne’e importante duni tanba ami iha Education Management Information System (EMIS) maibé la atualizadu, tanba ne’e maka dadus iha tinan 2020 to’o 2021, ho nune’e ami komesa serbisu hamutuk ho projetu edukasaun bázika (BEST, sigla inglés) hodi atualiza fai dadus sira ne’e,” nia tenik.
Jornalista : Tomé Amado
Editora : Julia Chatarina
