Deputadu FRETILIN preokupa ho hela-fatin profesór dook hosi eskola
DILI, 05 jullu 2022 (TATOLI)—Deputadu Bankada Frente Revolusionária do Timor-Leste Independente (FRETILIN), José Paicheco, preokupa ho kondisaun hela-fatin profesór ne’ebé hanorin iha munisípiu barak, dook hosi eskola nune’e bele prejudika estudante sira simu matéria la tuir oráriu.
“Ha’u hakarak dehan de’it katak durante ne’e Governu liuhosi Ministériu Edukasaun Juventude no Desportu (MEJD) hanoin ona hodi kria kondisaun ba estudante sira, maibé haluha tiha atu kria kondisaun ba profesór sira,” Deputadu bankada Governu hateten iha sala plenária Parlamentu Nasionál, tersa ne’e.
Notísia relevante: MEJD aprezenta roteiru rekrutamentu profesór iha KM
Tuir Deputadu, Ministru tenke halo ona identifikasaun ba profesór sira ne’ebé maka hela dook hosi eskola, nune’e bele kria no fasilita sira inklui transporte no hela-fatin besik iha eskola atu profesór sira labele abandona sira-nia responsabilidade atu kumpre oráriu.
“Ita-nia profesór barak maka hela fatin dook hosi eskola. Sira la’o ain to’o eskola no dala ruma tuku 9 ka tuku 10 mak foin hanorin estudante sira. Ita-nia kurríkulu dehan profesór ida tenke hanoin kuatru oras kada loron ne’e nia la kumpre ona. Oinsá ita atu garante kualidade ensinu ba estudante sira,” nia tenik.
Tanba ne’e, MEJD bainhira halo konstrusaun edifísiu ba estudante sira labele haluha kria mós kondisaun ba profesór sira, atu nune’e Governu liuhosi MEJD mós bele halo transferénsia ba profesór sira, maibé tanba durante ne’e profesór sira laiha kondisaun maka difikulta eskola sira menus profesór ne’e.
“Ita fó ezemplu, profesór ne’ebé hela iha mota sorin kuandu udan boot nia labele ba hanorin sira. Entaun tenke halo netik uma ida besik iha eskola atu nia bele hela hodi kumpre ninia obrigasaun durante prosesu ensinu aprendizajen nia laran. Hafoin fim de semana maka nia bele ba vizita família sira,” nia akresenta.
Hatan ba preokupasaun ne’e, Ministru Edukasaun Juventude no Desportu, Armindo Maia, hateten, ministériu nia osan la sufisiente no daudaun fó prioridade hodi kria de’it sala aula ba estudante.
“Ita iha nesesidade barak maibé ita-nia orsamentu la sufisiente, tanba ne’e entre rezidénsia ho sala aula, ita fó liu prioridade sala aula ba estudante sira,” Ministru tenik.
Jornalista : Tomé Amado
Editora : Julia Chatarina
