DILI, 05 jullu 2022 (TATOLI)— Diretór Administrasaun no Finansa, Sekretáriu Estadu Juventude no Desportu (SEJD), Guido Monteiro, informa iha trimestre daruak ne’e, SEJD konsege ezekuta Orsamentu Jerál Estadu (OJE) 2022 ho 33,2%, ne’ebé ekivalente ho $1,998,637.76.
“Ezekusaun Orsamentu Jeral Estadu tinan ida ne’e iha trimestre daruak ikus ne’e ita foin atinje 33,2%, ida ne’e seidauk inklui komprimisiu ne’ebé mak iha sistema, maibé ezekusaun ami garantia too tinan ikus sei atinje 90% resin,” dehan diretor ne’e ba Agência TATOLI foin lalais ne’e.
Nia dehan, ezekusaun ne’ebé lao’ makas hela mak salariu no vensimentu, bens no servisu, transferénsia públiku, kapitál dezenvolvimentu no kapital menór.
“Kapitál dezenvolvimentu SEJD nia planu iha 2022 mak reabilitasaun kampu tenis iha Universidade Nasionál Timor-Lorosae (UNTL) ne’ebé tuir planu prepara ba jogu CPLP ne’ebé Timor – Leste mak atu sai uma-na’in iha tempu sira tuir mai ne’e, konstrusaun kampu multifunsaun Taibesi, ikus mak SEJD halo substituisaun ba uma Nahe Biti-boot ne’ebé uluk iha maibé anin hú monu tia ita tenke konstrui fila fali,” nia afirma.
Ba projetu boot tolu ne’e, SEJD preve orasamentu hosi kapitál dezenvolvimentu hamutuk $380.000
Orsamentu ba SEJD hanesan orijin $6,933,318.00, kompromisu sira $809,398.20, obrigasaun $304,677.71, atuál $1,998,637.76, saldu $3,820,604.33
Hosi totál orsamentu ne’e, sei aloka ba kategoria saláriu no vensimentu $638,496.00, bens no servisu $1,402,400.00, transferénsia públika $3,562,279.00, kapitál menór $600.000 no kapitál dezenvolvimentu $380,143.00.
Orsamentu ne’e atu finansia ba programa rua, sub-programa lima no atividade 19. Programa boa-governasaun no jestaun instituisionál sei gasta $2,351,216.00 no programa igualidade jéneru no inkluzaun sosiál sei gasta $4,232,102.00
Programa igualidade jéneru no inkluzaun sosiál ho nia objetivu médiu prazu joven timorense ho idade 12 to’o 30 dezenvolve sira-nia telentu, dezempeñu no espirítu kompetetivu no grupu joven promove ho envolvimentu iha sosiedade sivíl.
Sub-programa dezenvolvimentu área desportu ho nia atividade jestaun operasionál KRAM, realiza eventu nasionál iha área desportu, dezenvolve kapasidade instituisional iha organizasaun desportiva, dezenvolve rekursu umanu iha área desportu.
Sub-programa dezenvolvimentu iha área juventude ho atividade realiza eventu nasionál iha área juventude, dezenvolvimentu ba kapasidade instituisionál organizasaun juventude, dezenvolve kapasidade rekursu umanu ba joven, insentivu ba empreendedorizmu sosiál ba joventude iha suku.
Sub-programa dezenvolvimentu infraestrutura no fasilita área juventude ho desportu ho atividade konstrusaun kampu multifunsaun iha Taibesi, konstrusaun kampu komunitáriu, konstrusaun no reabilitasaun edifísiu SEJD, reabilitasaun kampu tenis iha UNTL.
Entretantu, programa boa-governasaun no jestaun instituisionál ho nia sub-programa rua (2) no atividade hitu (7).
Jornalista: Hortencio Sanchez
Editór : Florencio Miranda Ximenes
