Asidente tráfegu hamate ema na’in-tolu iha kapitál Dili

DILI, 07 Jullu 2022 (TATOLI)— Hahú hosi loron 1 to’o 7 jullu ne’e, Komandu Polisia Munisípiu Dili liuhosi Unidade Polísia Tránzitu Munisípiu Dili, rejista ema na’in-tolu mak lakon vida tanba asidente tráfegu.
“Iha semana dahuluk, hahú hosi loron 1 to’o 7 jullu, ita rejista ona kazu asidente tráfigu grave tolu ne’ebé hamate ema na’in-tolu,” Komandante Tránzitu Polísia Munisípiu Dili, Inspetór Xefe, Polisia Domingos Gama, ba jornalista sira iha knar fatin, Caicoli, kinta ne’e.
Kazu asidenta tráfegu tolu ne’e kompostu, kazu asidente tráfigu grave akontese iha loron 3 jullu 2022, ne’ebé konsege hamate vítima AV, ne’ebé lori motór hosi diresaun Manleuana hodi ultrapasa dalan derepente vitima hetan soke hosi suspeitu DI ho nia karreta no vitima mate fatin.
Iha loron 6, mosu tán asidente tráfigu grave ida, iha área Delta nian besik Timor Block nia oin, vítima ho naran Isac Gusmão ho nia motorizada atu ultrapasa estrada, derepente hetan soke hosi suspeitu JS ho karreta, rezulta matebian nia ulun nakfera no mate fatin.
Ikus liu iha loron , asidente tráfigu grave ida iha área Formoza, ne’ebé sidadaun estranjeiru hosi Portugál ho isiál CAG, soke mate vitima ho moras mentál ida (identidade seidauk idantifika), bainhira vitima ne’e atu ultrapasa estrada.
“Ami asegura hotu evidénsia motorizada vitima liuliu karreta hosi suspeitu sira nian, ne’ebé daudaun para ona iha Komandu PNTL Dili. Ami submete autó notisia asidente grave sira ne’e ba ona Ministeriu Públiku,” nia informa.
Maske, Komandante ne’e esplika família parte vitima no supeitu balun hasoru malu hodi rezolve tuir familia, maibé prosesu investigasaun ba kazu asidente grave hirak ne’e sei kontinua la’o.
Tanba, nia dehan asidente tráfegu ho tipu grave polisia la permite atu rezolve tuir família, nune’e investigasaun polisia tenke kontinua la’o hodi submete auto notisia ba MP, hafoin prosesa ba tribunál. Tribunál mak sei hasai desizaun ikus kazu hirak ne’e.
“Ami la permite asidente tráfegu ho tipu grave atu rezolve iha polísia no polisia mak atu sai mediadór. Ami só permite ba kazu asidente kamaan sira, hanesan karreta no motór soke malu hetan estragu lori mai iha iha ne’e ami autoriza parte rua bele rezolve tuir familia,” nia afirma.
Atu Evita kazu asidente tráfegu, Inspetór Xefe ne’e husu ba motorista sira ne’ebé lori motór ka karreta, tenke matan moris no neon nain nafatin, respeita ba iha kódigu estrada.
“Ha’u husu motista sira, fulan jullu hanesan fulan ne’e ladún di’ak, motorista sira lori motór no karreta karik tenke kuidadu aan , respeita ba kodigu estrada no regra tránzitu sira, uza kapasete sai tenke kontrola motór ka karreta nia kodisaun, atu ita bele prevene númeiru asidente ne’ebé kada loron kontinua sa’e,” Komandante Gama sujere.
Jornalista: Natalino Costa
Editór : Florencio Miranda Ximenes

