DESPORTU, HEADLINE

Ekipa MAE no MOP sai kampiaun iha torneiu futsal BNCTL 2022

Ekipa MAE no MOP sai kampiaun iha torneiu futsal BNCTL 2022

Jogu Futsal Feto, ekipa Tatoli,I.P, kontra ekipa PLAN Internasionál. Iha salaun Kampu Fotsal Bebora Dili, kuarta (06/07). Imajen Tatoli/Francisco Sony

DILI, 07 jullu 2022 (TATOLI)—Ekipa feminina hosi Ministériu Administrasaun Estatál (MAE) no ekipa mane hosi Ministériu Obra Públika (MOP) sai kampiaun iha tasa Banku Nasionál Komérsiu Timor-Leste (BNCTL, sigla portugés) 2022.

Ekipa feminina MAE sai kampiaun tanba iha jogu finál konsege halakon ekipa feminina hosi Banku Nasionál Ultramarinu (BNU) ho eskore 3-1.

Enkuantu ekipa mane hosi MOP sai primeiru lugár tanba halakon ekipa Grupu Media Nasionál (GMN) ho eskore 7-4.

Hafoin jogu ramata Diretór Ezekutivu BNCTL, Brigido de Sousa, hateten agradese ba ekipa hotu ne’ebé partisipa ona torneiu ne’e tanba ho objetivu hametin liután amizade institusionál.

“Ita sei la to’o iha ne’e de’it, ita ba oin ita sei realiza tan tasa BNCTL nian ho modalidade oin-oin. Ha’u hakarak mós kongatula ba klubu sira ne’ebé, ohin sai kampiaun no ba hothotu  ne’ebé maka partisipa iha  kompetisaun ne’e no obrigadu ba imi nian partisipasaun tomak,” Diretór Brigídio afirma.

Iha biban hanesan, treinadór MOP, Dinis Soares, sente kontente tanba nia ekipa bele sai primeiru lugar iha tasa BNCTL 2022.

“Ami ho preparasaun ne’ebé menus tebes, maibé bele partisipa ho di’ak eventu ne’e, tanba ne’e husu BNCTL atu kontinua atividade sira hanesan ne’e hodi hametin liu tan amizade,” nia afirma.

Entretantu, jogadora feminina hosi MAE, Renata Ana Araújo, mós sente kontente bele partisipa eventu taxa BNCTL 2022 no husu atu ministériu hotu ba oin realiza atividade sira hanesan hodi hametin amizade institusionál no anima mós komunidade sira.

Jogadóra ne’e mós sente kontente no agradese tanba bele sai mellór markadór iha tasa BNCTL 2022 ho golu 11.

BNCTL fó prémiu ba ekipa sira ne’ebé sai kampiuan hanesan ekipa mane hosi MOP ho osan valór $1.500 ho taxa no ekipa feminina MAE ho osan valór $1.500 ho taxa.

Enkuantu ba ekipa segundu lugar hanesan futsal mane GMN hetan prémiu ho valór $1.000 ho taxa no ekipa futsal feminina BNU hetan osan $1.000 ho taxa.

Ba ekipa treseiru lugar mak ekipa mane BNCTL hetan prémiu $750 no ekipa feminina Plan Internasionál hetan osan $750 ho tasa.

Entretantu, mellór markadór nain-rua hosi ekipa mane BNCTL hetan $500 no feto hosi MAE hetan osan $500.

Notísia relevante:  Torneiu futsal BNCTL: Ekipa femenina TATOLI okupa kuartu lugar

Jornalista: Natalino Costa

Editór     : Florencio Miranda Ximenes

iklan
iklan

Leave a Reply

iklan
error: Content is protected !!