HEADLINE, INTERNASIONÁL, JUSTISA, NASIONÁL

PM afirma la tolera entidade halo prátika tráfiku umanu

PM afirma la tolera entidade halo prátika tráfiku umanu

Ilustrasaun

DILI, 07 jullu 2022 (TATOLI)-Primeiru-Ministru (PM), Taur Matan Ruak, afirma, sei la tolera entidade ne’ebé halo prátika tráfiku umanu, hanesan lori sidadaun timor-oan sira ba rai-li’ur hodi ikus mai hasoru problema.

“Ha’u-nia orientasaun ba Ministériu Justisa no Polísia Siéntifika Investigasaun Kriminál (PCIC, sigla portugés), sé iha krime organizadu no tráfiku umanu tenki kaer hotu, tanba sira lori ita-nia sidadaun ba husik hela iha fatin-fatin, kuandu a’at ona Governu mak responsabiliza no Governu mak sala, kuandu di’ak sira la liga Governu, bá ne’ebé la’o de’it, kuandu labele ona, Governu mak tenki lori fila, a’at ona Governu mak tenke lori fila, ne’e labele,” PM Taur hateten hafoin ramata reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.

Notísia relevante: PCIC detein suspeitu nain-tolu ba kazu tráfiku umanu

Ba kestaun ne’e, Xefe Governu bolu atensaun entidade ne’ebé trata timor-oan bá serbisu iha rai-li’ur, atu iha responsabilidade.

“Sira tenki koopera, klaru katak sira iha esforsu atu oinsá mak moris, maibé sira mós hanoin katak labele hanoin di’ak de’it, hanoin mós a’at, kuandu a’at karik sé mak sira bele konta. Ami agora tolera maibé loron ida ami haruka sira (ajénsia) mak selu fila, sira osan iha para haruka bá entaun sira mós iha osan atu haruka fila. Sira labele fó fali ba Governu,” nia akresenta.

Foin lalais, iha ajénsia balun lori timor-oan na’in-hitu bá Dubai atu serbisu, maibé ikus mai sidadaun hirak ne’e hasoru difikuldade.

Hafoin mosu reklamasaun, ajénsia ne’e tenta lori fila timor-oan na’in-hitu maibé to’o de’it Jakarta, Indonézia, hafoin Governu liuhosi Ministériu Negósiu Estranjeiru no Kooperasaun (MNEK) ho koordenasaun reprezentante iha rai-li’ur trata billete hodi bele repatria timor-oan hitu hosi Jakarta.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!