DILI, 08 jullu 2022 (TATOLI)–Empreza estranjeiru, Shayan Rayan prodús manu Day Old Chick (DOC) ka manu-oan iha Timor-Leste hodi fornese ba distribuidór rai-laran hamutuk 1.020, hodi oferese produtu sira ne’ebé bele prodús sai hahán manu.
Antes ne’e, atividade hakiak manu DOC lansa ona foin lalais, maibé iha agostu 2022 sei halo lansamentu ba fatin hakiak manu-inan iha Loes, postu administrativu Maubara, munisípiu Liquiçá, ne’ebé importa hosi rai-li’ur (Indonézia).
“DOC ne’e prodús iha Timór no manu-inan sei mai hosi Indonézia, hafoin hakiak manu-inan iha Loes no tolun, mak sei lori fali bá Hera, hafoin ida-ne’e mak prodús sai DOC tiha hodi fornese ba konsumidór sira. Fulan-agostu sei iha lansamentu hakiak manu-inan iha Loes no husu Primeiru-Ministru atu partisipa iha seremonia ne’e,” Diretór empreza Shayan Rayan, Ayub Joseph Karimi, informa hafoin ramata hasoru malu ho Primeiru-Ministru (PM), Taur Matan Ruak, iha Palásiu Governu, sesta ne’e.
Notísia relevante: Importasaun manu DOC menus fó impaktu ba produsaun manutolun
Hafoin rona esplikasaun hosi empreza, PM Taur ksolok tebes ho empreza ninia investimentu hodi ajuda produtu lokál hanesan manu, ne’ebé dala barak importa hosi li’ur.
“Entaun ami ho maneira ida, manu-inan hosi Indonézia mai hakiak iha-ne’e (Timor), nune’e prodús nia tolun no oan, nune’e presu ba manu menus. Ami prepara ona fatin ba manu-inan sira ne’ebé lori hosi rai-li’ur, iha Loes. Aleinde ne’e, fatin fábrika falun no hamoos molok hatama ba merkadu hodi fa’an ba públiku,” nia esplika.
Empreza ne’e eziste ona iha Timor-Leste desde tinan 2019 no durante ne’e hala’o atividade produsaun animál hanesan karau, ikan, manu, bibi no fó serbisu diretamente ba timor-oan hamutuk 32.
Jornalista : Antónia Gusmão
Editora : Julia Chatarina
