iklan

NASIONÁL, DILI

Governu integra veteranu iha vida ekonómika liuhosi pensaun-subsídiu

Governu integra veteranu iha vida ekonómika liuhosi pensaun-subsídiu

Prezidente Konsellu veteranu. Vidal de Jesus "Riak Leman". Imajen Tatoli/Francisco Sony.

DILI, 08 jullu 2022 (TATOLI)–Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, hateten veteranu nia sakrifísiu no luta ba libertasaun mak Governu integra iha vida ekonómika no sosiál mak atribui osan liuhosi pensaun no subsídiu tuir grau. 

Notísia Relevante: CCLN sei fó $20,000 ba veteranu grau 0-3 kria grupu buka moris

“Ita atu ko’alia kona-ba Governu integra kombatente libertasaun ba vida ekonómika no sosiál mak Governu rekoñese, valoriza no proteje Kombatente Libertasaun Nasionál no defende katak kombatente iha papél ativu liu iha prosesu konsolidasaun ba pás, aprofundamentu ba demokrasia progresu iha país ne’e mak atribui pensaun no fó subsídiu ba sira hodi sustenta no balun halo negósiu hodi moris,” Riak Leman hateten ba Agência TATOLI, iha nia knar fatin Comoro, Dili, kinta ne’e.

Tanba ne’e, Governu defende kontinuidade ho aprofundamentu atu hola medida ba segmentu importante ida-ne’e iha sosiedade Timo-Leste laran, iha ámbitu polítika estabilidade no koezaun sosiál.

“Implementa medida ba dezenvolvimentu projetu kiik ne’ebé bele fó rendimentu, liuhosi finansiamentu Estadu nian no mós kriasaun fundu espesífiku ida mak koordena hamutuk SASCAS hodi apoiu osan ba veterenu ho grau 0-3 no 4-7 hodi buka moris,” nia dehan.

Atu ko’alia kona-ba vida ekonómika, nia dehan, defisil atu moris di’ak tanba dala barak osan ne’ebé mak Governu fó la’ós halo negósiu ruma hodi moris, maibé dala ruma utiliza sala hodi halo fali buat seluk.

“Maibé liuhosi Planu SASCAS ho CCLN bele ajuda veteranu sira hosi hasa’e sira-nia rendimentu liuhosi kriasaun grupu veteranu hodi bele haki’ak animal no halo to’os ruma atu bele hetan rendimentu,” Riak Leman.

Husu kona-ba progresu no susesu ba programa ne’e, nia hatán, progresu no susesu mak veteranu balun moris di’ak no balun harii ona uma iha ida-idak nia munisípiu sira.

“Liuhosi subsídiu no pensaun ne’e ita-nia maluk veteranu balun halo negósiu hodi sustenta moris no balun selu nia oan nia eskola iha rai-laran no rai-li’ur,” nia hateten.

Riak Leman hateten, ho kualidade no kriasaun oportunidade ba empregu mak sei sai nafatin hanesan instrumentu fundamentál atu bele sai hosi moris-kiak.

Atu to’o iha ne’ebá, Estadu nia dever mak atu asegura katak Kombate Libertasaun Nasionál sira-ne’ebé simu sakrifísiu barak tebe-tebes ba Pátria, feto ho labarik sira-ne’e mak rezide formula susesu ba dezenvolvimentu sustentável.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!