SEPS rejista vítima inundasaun iha territóriu nasionál hamutuk 1.361

DILI, 08 jullu 2022 (TATOLI)-Sekretáriu Estadu Protesaun Sívil (SEPS), Joaquim Gusmão, akompaña hosi Prezidente Autoridade Protesaun Sívil (APS), Superintendente Polísia, Ismael Babo, enkontru ho Primeiru Ministru, Taur Matan Ruak, hodi relata dadus vítima inundasaun munisípiu hitu hamutuk 1.361 tanba kauza hosi udan foin lalais ne’e.
“Ami mai relata ba Primeiru Ministru situasaun dezastre naturál iha munisipiu hitu, ligadu ho udan foin daudaun ne’e. Bazea ba informasaun dadus ne’ebé ita rekolla to’o horiseik hamutuk familia 1.361 maka afeta ba dezastre naturál,” Sekretáriu Estadu Protesaun Sivil, Joaquim Gusmão informa ba jornalista sira iha hafoin ramata enkontru ho Primeiru Ministru Taur Matan Ruak, iha Palasiu Governu, sesta ne’e.
Vitima afetadu 1.361 ne’e kompostu hosi Munisípiu Viqueque, Lautém, Baucau, Manufahi, Ainaro, Covalima no Manatutu.
Iha Munisipiu Covalima, SEPS rejista uma-kain hamutuk 150 no ema hamutuk 547 ne’e kompostu hosi Postu Administrativu Suai Villa Postu Administrativa Tilomar no hosi Postu Administrativu Maukatar .
Iha Viqueque, uma -kain hamutuk 554 mak hetan inundasaun tanba bee sa’e afeta ba xefe família hamutuk 1.657. Vitima hirak ne’e hosi postu Viqueque Villa, Uatulari no Uatucarbau
Iha munisipiu Manufahi rejista familia uma-kain 206 ne’ebé maka afetadu ba iha inundasaun no xefe família hamutuk 1.014 no munisípiu Ainaro rejista família uma-kain tolu (3) maka afetadu.
Iha Baucau rejista uma-kain na’in-11 maka hetan inundasaun, enkuantu munisípiu Manatutu postu administrativu Barique mak uma-kain ne’ebé afetadu ba dezastre hamutuk 327 ho total família na’in-1.566, mai hosi suku Aubeon no suku Sikone Biloi.
Entretantu, iha munisípiu Lautem rejista familia rua maka afetadu dezastre natural no anin boot sobu uma ida iha Lautem no iha Baucau uma ida, iha Viqueque uma ida no Covalima mós uma ida.
Uma ne’ebé maka hetan estragu kauza hosi dezastre naturál hosi munisipiu hitu ne’e hamutuk 11, kompostu tolu iha Ainaro, 12 iha Baucau, ida iha Lautem ida iha Bobonaro no 189 iha Viqueque. Dezastre rai halai taka uma ida iha Bobonaro, uma ida iha Manufahi, uma ida iha Viqueque no uma ida iha LautÉm.
Nune’e, SEPS halo ona apoia emerjénsia hanesan ai-han no la’os ai-han tanba Protesaun Sívil rasik iha ai-han no la’ós ai-han pakote hamutuk 500 iha armazein iha munisipiu hotu.
“Ami nia ekipa iha tereñu kontinua fó apoiu ba vitima dezastre naturál sira iha Viqueque, Covalima no Manufahi,” nia afirma.
Biban ne’e, Primeiru Ministru fó orientasaun ba Sekretáriu Estadu Protesaun Sivil (SEPS), no Autoridade Protesaun Sivil (APS) atu fó intervensaun rápidu ba iha komunidade sira ne’ebé afetadu ba dezastre.
“Primeiru Ministru orienta katak hosi parte seluk bele fó ajudu maibé parte Governu tenke fó asisténsia rápidu ba iha ita nian vítima sira,” nia dehan.
SEPS mós relata ba Xefe Governu kona-ba enkuadramentu balun hosi Autoridade Protesaun Sivil ne’ebé sei iha hela prosesu no balun ne’ebé atu halo diskusaun iha Konsellu Ministru, nune’e bele fó kbi’it liután ba autoridade ne’e, bele halo serbisu iha futuru ho di’ak.
“Kona-bá prosesu instalasaun edifisiu Nasionál Autoridade Protesaun Sivil nian ne’ebé sei iha hela faze diskusaun ho Ministériu Justisa atu atribui rai hodi harii edifisiu,” nia karesenta.
Jornalista: Natalino Costa
Editór : Florencio Miranda Ximenes

