Aban, selesaun nasionál seniór arranka bá Bali
DILI, 11 jullu 2022 (TATOLI)– Adjuntu Sekretáriu Jerál Federasaun Futeból Timor-Leste (FFTL), Frederico Martins, informa ekipa selesaun nasionál seniór na’in-18 arranka bá Bali-Indonézia, hodi hala’o jogu amigavél ho ekipa seniór Filipina nian.
“Aban, ita nia ekipa seniór arranka bá Bali atu hala’o jogu amigavel ho ekipa seniór Filipina nian. Ida ne’e konvite ida hosi Filipina atu hala’o jogu amigavél ho sira, ne’ebé buat hotu fasilidade saida de’it liuliu billete aviaun no seluk tan Filipina mak sei toma konta no ita bá de’it,” Adjuntu Frederico, hateten ba Agência TATOLI iha edifisiu FFTL, segunda ne’e.
Jogu amigavél ne’e ekipa seniór sei estadia iha Balid durante semana ida resin ne’ebé Filipina mak ajuda osan hamutuk $24,000 hodi hala’o jogu no fasilidade hotu.
“Jogu amigavel ne’e sei hala’o iha 16 jullu, kona-ba kampu ne’e iha klube futeból Bali United mak responsabiliza,” nia dehan.
Treinadór ba ekipa nafatin lidera hosi treinadór Brazileiru Fabio Maciel da Silva no Silas Paixão hanesan treinadór fiziku.
Iha sorin seluk, Kapitaun Ekipa Seniór, Filomeno Juniór da Costa, hateten kona-ba preparasaun lao di’ak tanba treinamentu hahú ona iha semana kotuk iha kampu FFTL.
“Ami komesa treinu semana kotuk, nune’e iha preparasaun durante semana ida resin ona no iha jogadór seniór na’in haat mak treinadór bolu mai hamutuk tan ho ekipa. Ha’u sente kontente ho prezensa jogadór seniór sira nian ne’e atu reforsa tan ekipa,” nia afirma.
Nia relata, ekipa seniór Filipina nian la’ós ekipa ne’ebé fraku, maibé forte tebes, nune’e presiza preparasaun ne’ebé másimu atu bele enfrenta joga ne’e.
Jogadór seniór na’in haat ne’ebé treinadór foin bolu hamutuk ho ekipa mak hanesan, Rofino Gama, João Pedro, José Santos no Gelvanio Marçal.
Jogu kontra Filipina hanesan jogu importante hodi koko ekipa Timor-Leste nia forsa tanba iha tempu besik Timor-Leste liuhosi ekipa seniór sei kompete mós iha kopa Mitsubishi AFF 2022 nian.
Notísia relevante: Semana oin, selesaun nasionál seniór hahú treinamentu
Jornalista: Hortencio Sanchez
Editór : Florencio Miranda Ximenes
