iklan

EDUKASAUN, HEADLINE

Estudante 1.102 hosi Eskola ESJ rua prontu partisipa ezame nasionál

Estudante 1.102 hosi Eskola ESJ rua prontu partisipa ezame nasionál

ESJ Nicolau Lobato, Comoro. Imajen TATOLI/Egas Cristóvão

DILI, 11 jullu 2022 (TATOLI)–Estudante na’in-1.102 hosi Eskola Ensinu Sekundáriu Jerál (ESJ) 12 Novembru Becora no ESJ Nicolau Lobato Comoro prontu partisipa ezame nasionál ne’ebé sei realiza iha outubru tinan ne’e no dadus sira aprezenta ona ba Diresaun Servisu Edukasaun Munisípiu Dili.

Adjuntu Diretór Eskola ESJ 12 Novembru Becora, Kanisus Elu, hateten, totál estudante finalista atu tuir ezame nasionál hamutuk 670 ba tinan ne’e, kompostu hosi Siénsia Teknolojia 348 no Siénsia Sosiál Umana 322.

“Ha’u bele dehan 90% lista estudante sira submete hotu ona, sei falta de’it dokumentu estudante balun maka sei halo legalizasaun iha edukasaun nasionál,” Adjuntu Diretór informa ba Agência Tatoli, iha Eskola ESJ Becora, segunda ne’e.

Notísia relevante: Dadus provizóriu: estudante 17.283 hosi Dili sei partisipa ezame nasionál

Servisu Edukasaun hosi munisípiu hatún ona despaixu  ba eskola sira atu dadus estudante finalista ne’ebé sei tuir ezame nasionál iha tinan ida-ne’e tenke submete ona ba Edukasaun Munisípiu Dili, hahú hosi loron 22 agostu to’o 02 setembru, hodi nune’e bele fó tempu ba preparasaun ezame segundu períodu ne’ebé sei realiza iha loron 08 agostu 2022.

“Ami hein ezame ikus hamutuk dala-ualu atu kompleta 50% hosi mestre sira, nune’e bele termina estudante ne’ebé aprovadu ka reprovadu hodi kompleta 50% ba estudante sira atu hakat ba ezame nasionál,” nia akresenta.

Nune’e mós, Diretór Eskola ESJ Nicolau Lobato Comoro, Marcos Soares Paicheco, relata, totál dadus estudante finalista ne’ebé submete ona ba Diresaun Servisu Edukasaun Munisípiu Dili hamutuk 432, maski seidauk halo klasifikasaun ba estudante Siénsia Teknolojia no Siénsia Sosiál Umana, maibé ein jerál dadus hotu aprezenta ona ba edukasaun munisípiu.

Ezame nasionál sei realiza durante loron-tolu, hahú iha loron 24 to’o 26 outubru, ne’ebé parte Eskola ESJ, Ensinu Sekundáriu Tékniku Vokasionál (ESTV) inklui Ensinu Báziku (EB) terseiru siklu aprezenta hotu ona dadus fiksu ba munisípiu hodi submete ba nasionál, atu nune’e sira bele iha planu no kontinua taka ba munisípiu sira atu labele halo transferénsia, ho nune’e labele implika ba prosesu ensinu aprendizajen iha Dili.

Jornalista   : Tomé Amado

Editora       : Julia Chatarina

iklan
iklan

Leave a Reply

iklan
error: Content is protected !!