DILI, 11 jullu 2022 (TATOLI)—Ministu Koordenadór Asuntu Ekonómiku (MKAE), Joaquim Amaral, ho ekipa hala’o enkontru ho Xefe Estadu, José Ramos Horta, hodi atualiza kona-ba prosesu adezaun Timor-Leste (TL) ba Organizasaun Mundiál Komersíu (OMK).
Notísia Relevante: Sekretariadu OMK sei vizita Timor-Leste durante loron hitu
Nia hateten, ekipa sira atualiza ba Xefe Estadu no Xefe Estadu kontente ba prosesu Timor-Leste nia adezaun ba organizasaun internasionál ne’e.
“Ita mai atualiza ba Xefe Estadu kona-na Timor-Leste nia adezaun ba OMK. Prezidente Repúblika kontente tebes katak ita iha prosesu adezaun ho nasaun lubuk bo’ot ida, ita halo servisu makaas tebes ho apoiu ita-nia parseiru sira liu-liu sekretariadu Organizasaun Mundiál Komersíu fó asisténsia tékniku makaas tebes ba iha ita-nia ofisiál sira hosi delegasaun Timor-Leste, atu ita bele konkista to’o iha faze ida agora ita-nia nivél adezaun avansadu tebe-tebes. Bele fó garantia katak se ita kumpre hotu rekezitu sira iha dezembru, ita-nia relatóriu sei hetan apresiasaun hosi asembleia posivelmente bele gradua iha tinan oin iha fevereiru ka marsu,” nia hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, segunda ne’e.
Durante sorumutu, Prezidente Repúblika (PR) hateten adezaun TL ba OMK no ASEAN sei fó impaktu pozitivu ba prosesu dezenvolvimentu ekonómiku iha Timor-Leste no iha ajenda PR fó mós prioridade.
Ho delegasaun hosi Organizasaun Mundiál Komersíu (OMK) no Prezidente Grupu Traballu Timor-Leste nian ba adezaun nian, ekipa ida-ne’e konstitui ekipa Timor-Leste ne’ebé servisu ba iha Timor-Leste ninia adezaun ba OMK.
“Ita simu ona hosi OMK kalendáriu indikativu ba ita-nia adezaun, tanba ne’e mak ita-nia ekipa servisu makaas. Ita sei iha grupu traballu halo enkontru dala lima ne’ebé ita halo tiha ona dala tolu, nune’e presiza oportunidade ida atu ita-nia Prezidente grupu traballu hosi Jenebra ho ekipa mai Timor-Leste bele hasoru malu ho Prezidente Repúblika ho órgaun soberania sira seluk. Nune’e, entidade hotu atu bele rona, hatene Timor-Leste nia prontidaun ba iha Organizasaun Mundiál Komersíu, ho ne’e mak ohin ita iha oportunidade hasoru malu ho Prezidente Repúblika,” nia dehan.
Aleinde ekipa ne’e hasoru malu ho Xefe Estadu, ekipa mós hala’o sorumutu ho Primeiru-Ministru (PM) no Prezidente Parlamentu Nasionál.
“Enkontru ne’e hola parte mós ita-nia órgaun soberania sira bele hatene direta hosi sekretáriadu hosi ita-nia prezidente traballu ne’ebé servisu makaas ba Timor-Leste nia adezaun,” nia dehan.
Notísia Relevante: MEKAE-MTK kordena prepara prosesu adezaun Timor-Leste ba OMK
Jornalista : Nelson de Sousa
Editór : Cancio Ximenes
