iklan

HEADLINE, SEGURANSA

PNTL detein autór nain-lima envolve konfrontu iha Bekusi

PNTL detein autór nain-lima envolve konfrontu iha Bekusi

Membru PNTL halo parada iha ámbitu serimónia komemoraun loron Restaurasaun Independénsia Timor-Leste ba da-XX, iha Palásiu Prezidensiál, Bairro Pité, sesta (20/05). Imajen Tatoli/Francisco Sony

DILI, 12 jullu 2022 (TATOLI)— Komandu Polísia Munisípiu Dili,  detein ona autór na’in-lima ne’ebé deskonfia envolve konfrontu ka tuda malu iha área semitériu públiku Bekusi Kraik, suku Becora, postu administrativu Cristo-Rei, munisípiu Dili.

Komandante PNTL Munisípiu Díli, Superintendente Xefe Henrique da Costa, informa, kazu tuda malu entre joven-sira ne’e akontese iha segunda (11/07), iha tuku 01:00 madrugada.

Bainhira konfrontu ne’e akontese, Komandu PNTL simu informasaun hosi ekipa servisu sekreta Militár  (J2), nune’e orienta kedan ekipa patrullamentu Cristo Rei, hamutuk Forsa Rezerva no Servisu Nasionál Intelijénsia (SNI), ho servisu intelijénsia militár (J2) halo kedan atuasaun.

“Ita detein kedan ona autór nain-lima iha fatin akontesimemtu no lori kedan ba iha Eskuadra Cristo-Rei hodi halo identifikasaun no investigasaun. Autór nain-lima ne’e mane hotu ho idade 30 no balun minoridade,” Komandante PNTL ne’e hateten ba jornalista sira iha kna’ar fatin-Caicoli, tersa ne’e. 

Tuir relatóriu prelemináriu konfrontu ne’e mosu tanba iha provoka malu entre joven-sira hosi grupu Arte Marsiál Persaudaraan Setia Hati Terrate (PSHT) ho Grupu Arte Rituál hitu-hitu (77).  

Ekipa PNTL mós konsege tiru gas lakrimojéneu tanba iha konfrontu ne’e envolve ema ka joven barak.

“Ami hetan informasaun katak konfrontu ne’e entre joven parte Rituál 77 no PSHT mak provoka malu. Iha konfrontu ne’e laiha ema ida kanek,” nia relata.

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!