PNTL Dili sei sensibiliza programa prevene konflitu iha eskola sira
DILI, 12 jullu 2022 (TATOLI)— Polisia Nasionál Timor-Leste (PNTL) munisípiu Dili, tempu besik, halo sensibilizasaun ba programa tinan 2021 to’o 2026 ne’ebé ho tema sentrál “Ita envolve ema hotu hodi garante seguransa iha munisípiu Dili” ba eskola sekundáriu no universitáriu sira hodi prevene konflitu.
“Ita sei identifika eskola balun ne’ebé risku ba konflitu atubele halo sensibilizasaun. Ba programa ne’e hodi konsensializa ita nian estudante sira atu prevene konflitu iha eskola,” Komandante PNTL Munisípiu Dili, Superintendente Xefe Henrique da Costa, hateten ba jornalista sira iha nia kna’ar fatin-Caicoli, tersa ne’e.
Ekipa ne’ebé atu bá halo sensibilizasaun, kompostu hosi Ofisiál Polísia Suku (OPS), Polisia Investigasaun Munisípiu Dili no Unidade Polisia Tránzitu nian atu servisu hamutuk garante Dii sai fatin seguru.
“Ita nia membru iha de’it 500, ne’ebé ita la garante seguransa, tanba ne’e ita presiza tulun husi ema hotu, atu Dili sai fatin seguru ba ema hotu nian. Aleide ne’e mós liuhusi sensibilizasaun ne’e bele hadia ita nia étika,” nia afirma.
Komandu PNTL Dili hahú koordena ho parte operadór telekomunikasaun Telekomcel atubele fó apoiu parte téknika hodi programa sensibilizasaun ne’e la’o susesu.
Jornalista: Natalino Costa
Editór : Florencio Miranda Ximenes
