iklan

NASIONÁL, HEADLINE, SEGURANSA

Baku malu iha mate uma, UEP detein suspeitu na’in-neen iha Uatulari

Baku malu iha mate uma, UEP detein suspeitu na’in-neen iha Uatulari

UEP no Komandu Polísia Uatularai, detein joven na’in-neen ne’ebé envolve kazu baku malu iha mate uma, iha aldeia Liasidi, suku Afaloicai, postu administrativu Uatulari munisípiu Viqueque.Imajen/espesiál

DILI, 13 jullu 2022 (TATOLI)– Polisia Nasionál Timor-Leste (PNTL), liuhosi Unidade Espesiál Polísia (UEP) no Komandu Polísia Uatularai, detein joven na’in-neen ne’ebé envolve kazu baku malu iha mate uma, iha Aldeia Liasidi, suku Afaloicai, postu administrativu Uatulari, munisípiu Viqueque.

Komandante UEP, Superintendente Xefe Polisia, Orlando Gomes, informa kazu baku malu entre joven-sira ne’e akontese tanba hemu tua to’o lanu iha mate uma ida iha área Liasiadi, Viqueque.

“kazu baku malu ne’e rezulta vítima nain-rua mak hetan kanek iha ulun. Iha mometu ne’e ita nia membru sira hamutuk ho Polisia Uatulari halo kedas deteinsaun ba suspeitu na’in-neen ho inisiál AC, AA, AC, LA, PM, no MB,” Komandante UEP relata liuhosi nota ne’ebé Agência TATOLI, asesu, kuarta ne’e.

Iha prosesu detensaun ba suspeitu na’in-neen ne’e, UEP-COE lidera hosi Komandante Pelotaun Inspetór Asistente Polísia, Mateus Pinto hamutuk ho ekipa task force Viqueque nian ne’ebé destaka iha Uatulari.

“Agora suspeitu na’in-ne’e detein ona iha eskuadra PNTL Uatulari hafoin kontinua halo prosesu identifikasaun hodi submete ba investigasaun,” nia afirma.

Komandante Unidade Polisia Espesiál ne’e mós hatutan, daudaun ne’e membru UEP-COE ne’ebé destaka iha Munisípiu Viqueque hodi reforsa Komandu PNTL Viqueque hodi kontrola rigorozu ba joven sira ne’ebé perturba ordem públika.

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!