iklan

EDUKASAUN, HEADLINE

EBC 10 dezembru submete ona dadus estudante finalista 322 ba DSEMD

EBC 10 dezembru submete ona dadus estudante finalista 322 ba DSEMD

Ilustrasaun ezame. Imajen/Espesiál

DILI, 13 jullu 2022 (TATOLI)–Estudante finalista 322 hosi Eskola Ensinu Báziku Sentrál (EBC, sigla portugés) 10 dezembru Comoro preparadu ona atu partisipa ezame nasionál tanba eskola submete ona dokumentu estudante sira ba Diresaun Servisu Edukasaun Munisípiu Dili (DSEMD) hodi halo verifikasaun.

“Antes ne’e ami iha dadus anteriór estudante finalista sira, ne’ebé ami submete ona ba Diresaun Servisu Edukasaun Munisípiu Dili hamutuk 388, maibé hafoin ami verifika filafali dadus loloos estudante finalista sira iha de’it 322,” Diretór Eskola EBC, Calistro Guterres, informa ba Agência Tatoli, iha Eskola EBC Comoro, kuarta ne’e.

Notísia relevante: Dadus provizóriu: estudante 17.283 hosi Dili sei partisipa ezame nasionál

Nune’e, dadus hosi eskola públika ne’e fisku ona no lista estudante finalista sira foti hosi rezultadu partisipasaun estudante sira iha ezame períodu dahuluk.

“Ami sei fokus mós ba ezame períodu daruak. Ami sei submete mós valór no dadus estudante loloos inklui sertidaun baptizmu estudante sira, nune’e bainhira sira partisipa iha ezame nasionál labele falla iha database,” nia akresenta.

Tanba ne’e, parte eskola sei kompleta dokumentu estudante finalista sira hafoin sei submete dala-ida ba DSEMD, hahú loron 22 agostu to’o 02 setembru 2022, hodi nune’e bele garante no fó konsiderasaun ida katak estudante sira ne’e iha duni direitu atu partisipa ezame nasionál tanba sira ultrapasa ona ezame períodu dahuluk no daruak.

Eskola EBC 10 dezembru Comoro daudaun ne’e iha ona estudante hahú hosi 7o to’o 9o ano hamutuk 982, maibé totál númeru ne’e sei konsidera dadus anteriór ba períodu dahuluk nian tanba kada trimestrál dahuluk eskola sempre halo verifikasaun atu nune’e bele identifika dadus sira ne’e mantein ka iha mudansa.

Jornalista   : Tomé Amado

Editora       : Julia Chatarina

iklan
iklan

Leave a Reply

iklan
error: Content is protected !!