HEADLINE, JUSTISA

Tribunál aplika TIR ba arguidu na’in-rua falsifika dokumentu Estadu

Tribunál aplika TIR ba arguidu na’in-rua falsifika dokumentu Estadu

Servisu Migrasaun (SM konsenge detein sidadaun estrajeiru nain-rua ne’ebé maka halo falsifikasaun ba dokumentu hosi instituisaun Estadu nian atu hetan lukru.Imajen/SM

DILI, 13 jullu 2022 (TATOLI)— Diretór Jerál Servisu Migrasaun, Superintendente Asistente Polísia, Luis Soares Barreto, hateten hafoin aprezenta suspeitu na’in-rua ba Tribunál Distritál Dili (TDD), liuhusi Primeiru Interrogatóriu aplika medida koasaun Termu Identidade Rezidénsia (TIR) bá arguidu kazál na’in-rua ne’ebé halo falsifikasaun ba dokumentu Estadu.

“Arguidu na’in-rua ho inisiál WX (tinan 33) no HSJ (tinan 33) envolve iha kazu falsifikasaun ba dokumentu ofisiál nasaun nian ho sira-nia kárimbu rasik hodi halo vistu no pareser legál sira. Tribunál Disritál Dili (TDD) aplika medida koasaun TIR ba arguidu na’in-rua,” refere nota ne’ebé Agência asesu, kinta ne’e.

Notísia relevante:  SM detein sidadaun estranjeiru nain-rua ba kazu falsifikasaun dokumentu Estadu

Iha interrogátoriu dahuluk, Ministériu Públiku alega arguidu nain-rua ba Prizaun Preventiva. Maibé, parte defeza ka advogadu arguidu nian, Cancio Freitas husu ba tribunál atu aplika medida koasaun ba  nia-kliente hodi garantia  osan ba Estadu ho valór ema ida $50.000, nune’e totál ema nain-rua hamutuk  $100.000

Nune’e, Juís aseita no aplika TIR atu arguidu na’in-rua fila hikas ba nia-rezidénsia, maibé kontinua koopera hodi halo aprezentasaun obrigatóriu fulan ida dala rua, iha loron 1 no loron 15 ba Servisu Migrasaun.

“Aplika mós “Proibição de ausência” ka bandu arguidu nain rua labele sai hosi territóriu nasionál durante halo prosesu investigasaun. Entaun tribunál mós fó tempu ba Servisu Migrasaun hodi halo mandadu buska ba kompañia seluk tan ne’ebé nakait ba krime falsifikasaun refere,” nia relata.

Diretór Jerál hatutan, daudaun nia parte rekolla tan evidénsia balu ne’ebé iha ligasaun ho arguidu nain-rua inklui rona mós sasin sira nia deklarasaun no iha tempu besik halo fali relatóriu hodi informa ba PGR hodi kompletu prosesu investigasaun refere.

Entretantu, Advogadu Privadu, Cancio Freitas, hateten, Tribunál aplika TIR ba arguidu na’in-rua ne’e nesesáriu tanba sira koopera tebes ho justisa.

Ministériu Públiku husu atu tribunál aplika medida koasaun Prizaun Preventiva tanba arguidu nain-rua iha indísiu forte envolve duni iha krime falsifikasaun agravadu, ne’ebé previstu iha artigu 303, 304 no 309 hosi kódigu penál Timor-Leste.

“Nune’e, ha’u husu ba tribunál atu aplika   medida ne’ebé nesesáriu liu no adekuadu ba arguidu nain-rua maka TIR, medida koasaun ho garantia osan, medida aprezentasaun periódika no mós medida proibisaun auzénsia,” nia informa.

Tuir nia, medida TIR ne’e nesesáriu ona hodi asegura arguidu nain-rua ne’e hela iha uma de’it, labele halo fali atividade ne’ebé maka sira rua halo antes ne’e, tanba prosesu ba sira nain-rua seidauk ramata no sei kontinua iha faze investigasaun.

Jornalista: Hortencio Sanchez/Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!