iklan

HEADLINE, SEGURANSA

UPF detein sidadaun na’in-haat halo negósiu ilegál iha fronteira

UPF detein sidadaun na’in-haat halo negósiu ilegál iha fronteira

Unidade Patrullamentu Fronteira (UPF), detein sidadaun feto na’in-haat ne’ebé halo transasaun ilegál iha área Mota-Ain fronteita entre Timor-Leste ho Indonézia.Imajen/espesial

DILI, 13 jullu 2022 (TATOLI)– Polisia Nasionál Timor-Leste (PNTL) liuhosi Servisu Sesaun Sekreta Unidade Patrullamentu Fronteira (UPF), detein sidadaun feto na’in-haat ne’ebé halo transaksaun ilegál iha área Mota-Ain fronteita entre Timor-Leste ho Indonézia.

“Iha tuku 21:00, kalan ne’e, ita nia membru Servisu Sekreta halo detensaun ba ita nia sidadaun feto nain-haat ne’ebe mak komete krime transaksaun ilegál kombustivel tipu Gazolina jerigen litru 20, hamutuk 29 no litru 5 iha 7, hosi Atambua mai Timor-Leste,” Komandante UPF, Superintendente Polisia, Euclides Belo, hateten liuhosi nota ne’ebé Agência TATOLI asesu, kinta ne’e.

Iha prosesu identifikasaun, sidadaun feto na’in 4 ho inisiál, CM (tinan 50), ALP (tinan 18), YMB (tinan 31) no AV (tinan 31).

Nia dehan, sidadaun nain-4 ne’e UPF halo ona identifikasaun no termu entrega ba iha Eskuadra PNTL Batugade hodi halo prosesu investigasaun tuir lei ne’ebé vigór iha Timor-Leste.

Apreensaun ba sasán kultura

Alende ne’e, UPF liuhosi kompañia postu Mozon, halo apreensaun no asegura sasan kultura ne’ebé timoroan sira tenta halo transaksaun ilegál iha liña fronteira.

UPF halo apreensaun ba sasan kultura.Imajen/espesial

UPF konsege halo apreensaun sasan kulturál timór nian, hanesan osan mean, ai-moruk inklui motór tipu KLX 2 ne’ebé sidadaun sira uza no tenta halo transaksaun ilegál iha área fronteira.

“Maibé sasan hirak ne’e sei deskuñesidu tanba nain halai tama fali ba área Indonézia no ita nia membru sira la konsege detein,” refere nota.

Sasan hirak ne’e asegura ona iha kompañia Alfa, Tunubibi hafoin sei halo auto apreensaun hodi asegura iha Komandu PNTL Munisípiu Bobonaro hodi prosesa ba iha Ministériu Públiku.

Evidénsia ne’ebe UPF rekolla mak hanesan belak mean hamutuk 252, belak mutin 94, belak mean ki’ik 477, belak mutin kiik 152, lafa mean 58, lafa mutin 24, kaebauk 2, kelu/keke 10, maskana 60, morten 165, mas padi 19, brinkus 124, korente mas padi 52, mas mean 5.

Iha mós ai-moruk balun hanesan Paramex 494, strip supertetra 195 Strip, puyer/bintang 180, Dexanltarsen Dexa 400, Strip Inza pakote 124, Konidin pakote 2046 no objetu hirak ne’e priense ona auto apreensaun hodi asegura iha kompañia.

Daudaun, membru UPF nafatin halo vizilánsia maka’as iha fronteira hodi kontribui ba seguransa públika, nune’e bele halo prevensaun no garante liña fronteira sai fatin seguru ba ema hotu.

Jornalista: Natalino Costa

Editór : Florencio Miranda Ximenes

iklan
iklan

Leave a Reply

iklan
error: Content is protected !!