DILI, 14 jullu 2022 (TATOLI)— Komisaun Anti Korrupsaun (CAC, sigla Portugés) deskobre irregularidade hosi kompañia distributór balun, durante distribuisaun Cesta Bázika iha postu administrativu Laclubar, munisípiu Manatuto.
“Ami haruka suspende distribuisaun Cesta Bázika tanba iha kompañia distributór balun halo distribuisaun la tuir kontratu ne’ebé maka iha, liuliu liga ba presu tabela, hanesan naan karau ho folin $10, realidade iha distribuisaun la’ós naan karau, maibé kompañia ba hola naan-fahi iha loja hafoin kahur ho naan karau oituan ne’ebé presu $7 de’it,” Adjuntu Komisáriu CAC ne’e hateten ba Agência TATOLI iha nia knaar fatin Matadoru, kinta ne’e.
Notísia relevante: CAC deteta mosu irregularidade iha implementasaun Cesta faze daruak
Hafoin deteta irregularidade, nia dehan ekipa inspesaun no monitorizasaun informa kedan ba ministériu implementadór hanesan Sekretáriu Estadu Kooperativa (SEKOOP), hodi halo kedan intervensaun no deside suspende distribuisaun Cesta Bázika ba komunidade.
Diresaun Prevensaun CAC mós deteta kompañia distributór ne’ebé mánan konkursu hosi SEKOOP balun la distribuisaun produtu lokál ba komunidade, maibé produtu ne’ebé distribui maioria importasaun.
“Ami nia monitorizasaun identifika buat lubuk ida ne’ebé iha tendénsia ba irregularidade, liuliu produtu ne’ebé maka kompañia fornesedór sira tau iha empakotamentu hodi distribui ba iha komunidade ne’e, barak liu la’ós produtu lokál, maibé produtu importadór,” Adjuntu KAK ne’e lamenta.
Tuir dekretu-lei númeru 10/2022, liuliu kona-ba medida distribuisaun Cesta Bázika faze daruak ba agregadu família iha ámbitu rekuperasaun ekonómia, katak produtu lokál tenke 75% no kompañia tenke hola hosi produtór agrikola hanesan fehuk-ropa, lis mutin, fore-mungu no foos lokál.
“Ami mós deskonfia foos ne’ebé sira (kompañia) fahe ne’e kahur ona ho foo importasaun, maibé ami laiha kapasidade atu halo teste. Tanba rekursu laiha no ami laiha laboratóriu,” Adjuntu ne’e afirma.
Nune’e, Adjuntu CAC ne’e afirma iha tempu badak halo karta ba SEKOOP atu hadi’a mekanizmu implementasaun distribuisaun Cesta Bázika, nune’e povu bele sente nian benefisiu.
CAC ho Autoridade Inspesaun no Fsikalizasaun Atividade Ekonomia Sanitária no Alimentár (AIFAESA) kontinua halo kontrolu ba implementasaun distribuisaun Cesta Bázika iha faze daruak atu labele mosu manipulasaun oin-oin.
Notísia relevante: Governu lansa distribuisaun Cesta Bázika faze daruak iha aldeia Baia Leste
Jornalista: Natalino Costa
Editór : Florencio Miranda Ximenes
