Funsionáriu na’in-50 tuir formasaun komputadór bázika iha Baucau
BAUCAU, 14 jullu 2022 (TATOLI) – Funsionáriu na’in-50 komposta hosi liña ministeiriál tuir formasaun komputadór bázika hosi Sentru Treinamentu Intergral no Dezenvolvimentu Koléjiu (CTID, sigla portugés) Canossa ne’ebé apoia hosi Institutu Nasionál Administrasaun Públika (INAP).
Diretór Jerál INAP, Agostinho Letencio de Deus, hateten, funsionáriu hirak-ne’e kompostu hosi Ministériu Saúde, Ministériu Interior, Ministériu Agrikultura no Peska inklui administrasaun munisipál bazea ba lista ne’ebé identifika hosi Komisaun Funsaun Públika (CFP, sigla portugés) ligada ho funsionáriu sira-ne’ebé hasoru difikuldade bainhira utiliza komputadór.
“Ita atu eleva koñesimentu funsionáriu públiku kona-ba komputadór báziku, seluk prepara sira atu iha koñesimentu natoon atu partisipa iha ezame karreira ne’ebé sei hala’o iha fulan-agostu,” Diretór Jerál INAP ne’e hateten iha Vila Nova, kinta ne’e.
Partisipante sira tenke prenxe 40 oras durante hala’o formasaun ho durante loron-20 atubele prenxe rekizitu hanesan sertifikadu no eleva valór bainhira tuir ezame karreira hosi CFP.
Formasaun refere realiza bainhira INAP koordena ho CFP, Fundu Dezenvolvementu Kapitál Umanu (FDCH, sigla portugés) no responsabiliza hosi CTID Canosa Baucau, bazea ba kontratu integradu kona-ba formasaun komputadór bázika ba funsionáriu iha Baucau.
“Ita iha orsamentu natoon maibé sei reajusta tanba númeru partisipante nune’e sei iha mudansa,” Agostinho Letencio de Deus akresenta.
Funsionáriu hosi Saúde Baucau, nu’udar motorista ambulánsia João Rodrigues Ximenes, sente antusiazmu tuir formasaun tanba bele eleva koñesimenetu maibé nia parte sei koordena ho dirijente sira atu fó tempu natoon hodi tuir formasaun refere to’o rohan.
“Ho oportunidade ida-ne’e, ha’u agradese tebes no prontu atu tuir formasaun,” João Rodrigues Ximenes hateten.
Partisipa iha abertura formasaun komputadór baziku komposta hosi Diretór Jerál INAP Agostinho Letencio de Deus, Komisáriu CFP Asuntu Disipinár, António Freiras, Xefe Departamentu Peskiza Fiskalizasaun no Monitorizasaun FDCH, Fernando do Nascimento, Sekretáriu munisipál Baucau, Diretora CTID Canossa, Madre Maria Filomena da Costa Freitas no partisipante sira.
Jornalista : Natalino Belo
Editór : Evaristo Soares Martins
