HEADLINE, SEGURANSA

UPF-SNI halo apreensaun ba atributu arte marsiál iha fronteira

UPF-SNI halo apreensaun ba atributu arte marsiál iha fronteira

UPF halo apreensaun ba atributu PSHT. Imajen/espesial

DILI, 14 jullu 2022 (TATOLI)– Polisia Nasionál Timor-Leste (PNTL) liuhosi Unidade Patrullamentu Fronteira (UPF), hamutuk ho Servisu Nasionál Intelijensia (SNI), kuarta (13/07), kalan, halo apreensaun ba atributu Grupu Arte Marsiál (GAM) Persaudaraan Setia Hati Terate (PSHT) tanba hatama ilegál hosi suku Batugade, postu administrativu Balibo, munisípiu Bobonaro.

“Ita nia membru Servisu Sekreta hosi Komandu UPF ho SNI halo vizilánsia hamutuk iha fronteira konsege hetan komunidade balun tenta hatama atributu Grupu Arte Marsiál ne’ebé partensia ba grupu Persaudaraan Setia Hati Terate (PSHT), tuir dalan ilegál,” Komandante UPF, Superintendete Polísia Euclides Belo, hateten liuhosi nota ne’ebé Agência TATOLI asesu, kinta ne’e.

Iha operasaun ne’e, ekipa konjunta la konsege detein autór-sira tanba konsege halai no so’e hela sasan sira iha mota-laran,  maibé  ekipa sei esforsa-an halo servisu extraordináriu iha liña fronteira hodi buka tuir suspeitu sira ne’e.

“Sira halai so’e hela saku boot ida, plástiku boot rua, pasta ida, farda treinu PSHT pár 52, sintu (sabuk) hena mutin 20, faru PSHT kór mutin ida, kór metan haat, pasta ki’ik hamutuk 14.  Atributu hirak ne’e ita asegura ona iha Kuartél UPF iha área fatuk bo’ot, Batugade,” Euclides Belo relata

Komandante Euclides, hatutan fronteira terrestre hanesan fatin ne’ebé mak luan no presiza apoia hosi komunidade sira atubele halo kapturasaun ba ema sira ne’ebé mak tama no sai ilegál.

“Ita nafatin servisu hamutuk ho komunidade iha liña fronteira, faktu hatudu katak informasaun hotu ne’ebé iha mai hosi komunidade, ne’ebé iha ona konsiénsia nasionalizmu no hatene sentidu Estadu mak pasa informasaun ba servisu sekreta UPF no SNI,” nia agradese.

Nune’e, Komandante UPF kontinua apela nafatin ba komunidade sira atu servisu hamutuk ho membru sira hodi asegura no prevene ema labele hakur liu fronteira ho ilegalmente, nune’e bele asegura didi’ak fronteira terrestre.

Notísia relevante: UPF detein sidadaun na’in-haat halo negósiu ilegál iha fronteira

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!