Top

MJ sei konstrui kazerna no sosa farda ba Guarda Prizionál Suai

Ministru Justisa, Tiago Amaral Sarmento, sesta ne’e, halo vizita traballu bá Estabelesimentu Prizionál Suai, munisipiu Covalima. Imajen/Natalino Costa

DILI, 15 jullu 2022 (TATOLI)— Ministru Justisa, Tiago Amaral Sarmento, sesta ne’e, halo vizita traballu bá Estabelesimentu Prizionál Suai, munisipiu Covalima, hodi observa kondisaun prizaun Suai no rona direta preokupasaun Guarda Prizionál no dadur sira.

Iha vizita ne’e, Ministru Justisa, promote sei rezolve preokupasaun Guarda Prizionál, hodi konstrui kazerna, sosa farda, manutesaun ba transporte ka carro celula, instala CCTV no rezolve fasilidade sira hanesan komputadór no mákina imprime hodi fasilita funsionamentu serbisu prizaun Suai.

“Kazerna ba Guarda Prizionál Suai uluk halo ona dezeñu no Bill off Quantity (BoQ), maibé seidauk halo nune’e espera tinan oin (2023) bele halo konstrusaun. Kona-bá farda presiza tau iha planu no programa atu tinan oin bele rezolve,” Ministru Justisa ne’e hateten.

Kona-bá problema Closed Circuit Television (CCTV), Ministru Tiago mós promote  esforsu hodi halo akizasaun atubele instala iha Prizaun refere. 

Ministru Justisa, Tiago Amaral Sarmento, hasai foto hamutuk ho Diretor Estabelesimentu Guarda Prizionál no membru sira. Imajen/Natalino Costa

“Ha’u hanoin ne’e asuntu importante mós, ha’u sei haree tanba oramentu tinan ne’e laiha kapitál menór, maibé lei fó dalan ba Ministru atu halo ezersísiu ida iha tranferénsia husi item ida ba item seluk nune’e bele rezolve took asuntu ne’e,” nia kompromete.

Nia promote mós iha tempu badak bele rezolve fasilidade hanesan komputadór, mákina imprime no kartaun identidade ba iha Guarda Prizionál Suai.

“Semana oin, ha’u sei konvoka enkontru ho Diretór Jerál inklui kargu Xefia sira seluk atu buka rezolve lalais buat ki’ik sira ne’ebé sai problema iha Ministériu durante tinan barak nia laran no fasilidade sira ba estabelesimentu prizionál sira,” nia afirma.

Atu kapasita Guarda Prizionál, Governante ne’e, dehan iha tempu badak haruka Guarda Priozionál hosi Suai, Becora no Gleno bá iha Indonézia hodi tuir formasaun.

Alende ne’e, nia informa Ministériu Finansa mós konfirma ona sei apoia véikulu hamutuk 12 hodi apoia serbisu operasionál Ministériu Justisa nian.

“Ita simu karreta hirak ne’e, ha’u sei halo despaisu hodi haruka balun mai iha ne’e (prizionál Suai) atu apoia serbisu liuliu tula dadur sira ba julgamentu iha Tribunál Distritál no tribunmál movél,” nia adianta.

Ministru Tiago hatutan halo ona despaisu atu Diresaun Aprovizionamentu loke konkursu ba kompañia sira atu halo manutesaun ba carro celula ne’ebé maka avaria ona.

“Espera tinan ne’e, kompañia ne’ebé mánan halo ona manutesaun ba karreta hirak ne’e atubele ajuda funsonamentu estabelesimentu prizionál sira,” nia espera.

Iha biban hanesan, Diretór Estabelesimentu Prizionál Suai, Júlio Dias Ximenes, husu ba Ministru Justisa atu hola kamára vizilánsia (CCTV), hodi monta iha prizaun ne’e atubele kontrola dadur sira ho di’ak liután.

“Ami nia preokupasaun mak ida ne’e no laiha komputadór no mákina imprime (printer) atu fasilita ami halo serbisu liga ba atendimentu dokumentu ruma no preokupasaun seluk maka farda ba iha Guarda Prizionál sira. Tanba farda ne’ebé Guarda Prizioneiru sira uza tinan barak ona ne’ebé balun dodok ona,” Diretór ne’e preokupa.

Responsavél ne’e husu ba MJ atu prevee iha Orsamentu Jerál Estadu (OJE) 2023 hodi bele konstrui kazerna ba Guarda Prizionál Suai.

“Ha’u hanoin kazerna ba Guarda Prizionál to’o agora laiha, nune’e husu Ministru Justisa tenke tau atensaun,” nia sujere.

Jornalista: Natalino Costa

Editór: Florencio Miranda Ximenes

Publisidade

Leave a Reply

Latest Post

error: Content is protected !!