HEADLINE, SEGURANSA

UPF halo apreensaun ba atributu GAM iha fronteira

UPF halo apreensaun ba atributu GAM iha fronteira

Komandante Unidade Polisia Fronteira (UPF), Superintendente Euclides Belo. Imajen Tatoli/Francisco Sony

DILI, 19 jullu 2022 (TATOLI)— Komandante Unidade Patrollamentu Fronteira (UPF), Superintendente Polísia Euclides Belo, informa ekipa konjunta  konsege halo apreensaun ba atributu Grupu Arte Marsiál (GAM), Persaudaraan Setia Hati Terate (PSHT) iha área Mota-Masin, aldeia Wetaba, Suku Beiseuk, postu administrativu. Tilomar, munisípiu Bobonaro.

“Ohin, ami-nia membru Servisu Sekreta UPF halo vizilánsia no operasaun ne’ebé lidera husi Komandante kompañia Bravo, Inspetór Asistente Polísia Olivio Alves, halo apreensaun ba atributu deskoñesidu Grupu Arte Marsiál hosi Persaudaraan Setia Hati Terate (PSHT), tuir dalan ilegál liuhosi área Mota-Masin, ne’ebé besik kedas fronteira Indonézia,” Euclides Belo hateten liuhosi nota ne’ebé Agência Tatoli asesu, tersa ne’e.

Komandante UPF afirma bainhira membru Servisu Sekreta identifika atividade ilegál ne’e halo kedas koordenasaun ho ekipa UPF atu bá halo detensaun, maibé  suspeitu sira rona karreta lian dezvia kedas lokál no halai so’e hela evidénsia iha karón rua nia laran.

Hafoin membru sira sobu karon rua ne’e hetan objetu ho klasifikasaun mak hanesan, farda treinu PSHT ho kalsa no faru pár hamutuk 19, pasta ki’ik hakerek PSHT 1922 hamutuk 100, kopu hakerek PSHT kaixa hitu.

“Bainhira ekipa konjunta halo operasaun la’o ain hodi tama iha ai-laran tuan sira, suspeitu sira halai lori mós evidénsia seluk tán iha pasta ne’ebé sira tara no ita-nia membru sira la konsege duni tuir tanba iha ona área livre (zona bebas),” nia afirma.

Nune’e, Euclides Belo husu ba sidadaun hotu ne’ebé hakarak atu halo negósiu bele liuhosi dalan legál tanba daudaun Governu dekreta ona katak ita-nia fronteira loke livre ona ba ema hotu.

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!