DILI, 19 jullu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, husu Governu no komisaun kompentente iha Parlamentu Nasionál (Komisaun D) atu fiskaliza ho efetivu liután ba kompañia distrubuidór sira hodi garante kualidade distribuisaun produtu Cesta Bázika ba to’o iha povu.
Aniceto Guterres hateten, kestaun kualidade produtu Cesta Bázika foti dezde iha programa refere implementa nune’e sai esperiénsia ba Governu atu haree fiskalizasaun inklui Parlamentu Nasionál rasik liuhosi komisaun kompetente atu halo fiskalizasaun.
Notísia Relevante: Deputada PLP kestiona empreza fahe produtu Cesta Bázika “fuhuk” iha Bobonaro
“Ita la fó sala ba Governu maibé Governu tenke fiskaliza tanba kestaun ida kualidade sasán fuhuk ne’e uluk iha tinan 2020, 2021 nian programa ida-ne’e la’o tiha ona maibé kestaun kualidade foti beibe’ik tiha ona. Ha’u hanoin Governu tenke aprende ho situasaun ida-ne’e hodi kontrola didi’ak kualidade sasán sira-ne’ebé fahe. Maibé hosi parte Parlamentu Nasionál, ha’u fó hanoin ba komisaun kompetente tenke halo koordenasaun hodi fiskaliza mós ba programa Cesta Bázika tanba ita iha rekursu barak mak koloka tau iha ne’eba tenke benefísiu maibé tenke rezulta iha kualidade di’ak,” Prezidente PN ne’e hateten liuhosi reuniaun plenária komisaun permanente iha Parlamentu Nasionál, segunda ne’e.
Deputada membru Parlamentu Nasionál (PN) hosi bankada CNRT, Maria Barreto, husu Governu liuhosi ministériu tutela atu fiskaliza ba kompañia sira hodi garante kualidade distribuisaun produtu Cesta Bázika ba to’o benefisiáriu sira.
“Iha munisípiu Bobonaro nian hanesan foin daudaun iha Deputada Domingas dos Santos foti ona maibé iha mós informasaun ne’ebé ami simu hosi benefisiáriu sira katak iha tinan kotuk bainhira distribuisaun Cesta Bázika sira hetan mós naan dodok maibé tinan ida-ne’e sira la hetan naan maibé hetan fali modo tahan dodook hanesan repoillu, mostarda mak fahe ba sira, depois lori fali formungu, koto ne’ebé mak fuhuk. Ne’ebé benefisiáriu sira dehan se di’akliu fahe de’it osan mak sira halo kompras rasik tuir nesesidade uma laran,’’ Deputada bankada opozisaun ne’e levanta iha reuniaun plenária
Tan ne’e, presiza fiskaliza hosi parte ezekutivu liu-liu ministéiru tutela ba kompañia sira atu garante kualidade produtu iha distribuisaun to’o ba iha benefisiáriu sira.
Deputada ne’e mós husu Governu atu presiza identifika didi’ak ba benefisiáriu reklamante ne’ebé iha tinan kotuk seidauk rezolve no daudaun ne’e sira nafatin seidauk atu solusiona tanba simu informasaun hodi lamentasaun sira hosi komunidade.
Deputadu Fretilin, Antonino Bianco, hateten programa Cesta Bázika Parlamentu Nasionál aprova ona orsamentu millaun $80 ne’ebé hein katak produsaun rai laran bele sufisiente atu sosa atribui ba benefisiáriu ne’ebé merese atu hetan.
“Uluk kedas baibain ha’u ko’alia iha ne’e naran katak ema sira-ne’ebé atu sai benefisiáriu labele sai vítima ba nia direitu, se kestaun distribuisaun kompañia sira mak sala ne’e la’ós Governu mak sala, tanba Governu autoriza ba kompañia sira no kompañia mak tenke distribui sasán sira ne’e ba populasaun no sira sente katak ne’e ladún di’ak lalika simu,” nia hateten.
Deputadu hosi bankada Governu ne’e husu populasaun ne’ebé seidauk inklui iha lista atu koordena ho autoridade lokál hodi iha konsiderasaun iha prosesu durante ne’e la’o ona.
“Problema ne’e ha’u hanoin naran katak xefe suku no xefe aldeia sira halo lista hodi iha konsiderasaun iha prosesu hodi bele hetan, maibé orsamentu ita aprova ona prevee to’o ba dezembru. Ne’ebé hanoin hanesan uluk sira-ne’ebé naran laiha lista tama iha reklamante,” nia dehan.
Hatán ba preokupasaun hosi reprezentante povu iha uma fukun PN, Governu liuhosi Sekretáriu Estadu Komunikasaun Sosiál (SEKOMS), Merício Juvinal Akara, nia-parte rejista hela sei enkamiña ba ministéiru tutela hodi bele fó resposta iha tempu tuir mai.
Jornalista : Nelson de Sousa
Editór : Cancio Ximenes
