STAE koordena MJ destaka funsionáiru iha fatin rejistu STAE munisipál
DILI, 18 jullu 2022 (TATOLI)—Sekretáriadu Tékniku Administrasaun Eleitorál (STAE) koordena ho Ministériu Justisa (MJ) liuhosi ninia notariadu atu destaka funsionáriu ba fatin rejstu STAE munisípál atu atende eleitór sira halo kartaun eleitorál.
Notísia Relevante: STAE sei resensia eleitorál ho sistema biométriku iha 2022
“Ami koordena ona ho Ministériu Justisa liuhosi notariadu atu oinsá buka meiu hodi destaka ninia funsionáriu ba fatin rejstu STAE nian iha munisípiu sira hodi fó atendimentu ba eleitór ne’ebé mak atu halo kartaun eleitorál,” Diretór Jerál Sekretáriadu Tékniku Administrasaun Eleitorál (STAE), Acilino Manuel Branco, nia dehan ba Agência TATOLI, iha nia knar fatin Caicoli, Dili.
Tanba, nia dehan, ida-ne’e mak sai difikuldade ida ba komunidade bainhira rejistu foun tanba sertidaun RDTL laiha no dokumentu ne’e rekezitu ida ba eleitór hodi halo kartaun eleitorál.
“Informasaun ida-ne’e, ha’u simu hosi diretór munisipál sira katak eleitór entuziasmu atu rejistu maibé buat ne’ebé komprova mak dokumentu ofisiál sira, entaun sira labele rejistu iha STAE munisípiu sira,” nia dehan.
Liuhosi informasaun ne’e, STAE nasionál halo komunikasaun hodi koordena ho notariadu hodi bele fasilita no apoiu tékniku liga ho sertidaun moris nian, entaun ho prezensa notariadu nian ne’e bele fasilita no ajuda eleitór sira karik presiza tanba dala barak kestaun ida-ne’e mak akontese iha terrenu.
“Espera katak koordenasaun ne’e bele fó atendementu ba ita-nia sidadaun ne’ebé mak di’ak liután iha futuru. Sira mós prepara ekipamentu para oinsá, iha tempu badak ruma sei halo atendimentu integradu iha nivél sira-ne’ebé mak STAE halo hela atendimentu,” nia hateten.
To’o fulan rua kotuk, Diretór STAE informa eleitór ne’ebé rejistu foun ne’e 2000-resin iha nível territóriu nasionál no totál eleitór iha Timor-Leste hamutuk 859,613, ne’ebé kompostu hosi nasionál 852,500 no diáspora hamutuk 7,133.
Notísia Relevante: Biométriku sei substitui kartaun eleitorál
Jornalista : Osória Marques
Editór : Cancio Ximenes
