WFP: TATOLI tenke kontinua fó informasaun di’ak ba ema hotu
DILI, 20 jullu 2022 (TATOLI)– Reprezentante Organizasaun Ai-han Mundiál Nasaun Unida (WFP, sigla Inglés) iha Timor-Leste, Dageng Liu, husu ba Agência TATOLI atu kontinua hadi’a-an hodi fó informasaun loos no di’ak ba ema hotu atu kontribui ba dezenvolvimentu nasionál.
Dageng Liu hato’o ninian mensajen ne’e relasiona ho TATOLI ninia aniversáriu ba dala-neen ne’ebé sei selebra iha loron 27 jullu 2022.
“Iha aniversáriu ne’e, ha’u fiar TATOLI kontinua esforsu maka’as hodi halo servisu no fó informasaun di’ak ba ema hotu atu kontribui ba dezenvolvimentu nasaun nian,” Reprezentante WFP ne’e hateten ba TATOLI iha Dili, foin lalais ne’e.
Dageng Liu mós kongratula estrutura no jornalista TATOLI tomak ne’ebé durante ezisténsia sempre fó espasu hodi halo kobertura ba atividade WFP iha Timor-Leste.
“Agradese ba servisu hotu ne’ebé TATOLI halo liuliu koopera di’ak ho WFP hodi públika ninia atividade. TATOLI ativu tebes hodi públika mensajen barak kona-ba servisu WFP iha setór seguransa ai-han, merenda eskolár no asuntu nutrisaun,” nia agradese.
Agência TATOLI sai hanesan fonte ofisiál informasaun, ne’ebé na’in hosi Agência ne’e mak Estadu Timor-Leste. Hanesan mós agência Notisioza sira seluk iha mundu, TATOLI mai ho papél ida atu halo kobertura no fahe informasaun importante ho lalais, akuradu ba territóriu no mós mundu.
TATOLI ezista bazeia ba desizaun Konsellu ministru, loron 3 fevereiru 2016, ne’ebé konsagra iha akta númeru 9/2016, no públika iha pájina Jornál Repúblika, iha loron 16 marsu 2016.
Instrumentu atu alkansa mak liuhosi vizaun no misaun TATOLI nia, mak TATOLI sai hanesan fonte úniku ba informasaun nasionál ho kredivél, kualidade ba benefísiu sidadaun Timor-Leste.
TATOLI nu’udar ajénsia notísia Timor-Leste ho karakter multikanál, multimedia, multiplataforma no multitarefa ne’ebé bele mós dezenvolvidu no iha funsaun nu’udar sentru produsaun filme no dokumentasaun nasaun, sentru opiniaun públiku nomós fórum informasaun públiku, sentru jestaun arkivu no dokumentu nasaun nomós sentru edukasaun-formasaun peskiza no dezenvolvimentu komunikasaun aplikada.
Daudaun, Agência TATOLI oferese notísia liuhosi lian haat hanesan, Tetun, Portugés, Inglés no Indonézia inklui mós halo públikasaun video sira liuhosi kanál Youtube.
Notísia relevante:PR Horta enkoraja TATOLI kontinua públika informasaun loos ba públiku
Jornalista: Hortencio Sanchez
Editór : Florencio Miranda Ximenes
