Administradór Viqueque husu Agência Tatoli, I.P intensifika kobertura preokupasaun iha baze
VIQUEQUE, 21 jullu 2022 (TATOLI)–Administradór munisípiu Viqueque, Januário Soares ‘Bolly’, husu ba mídia estatál Agência Tatoli, I.P hodi intensifika kobertura preokupasaun iha baze, nune’e bele lori informasaun ba nasionál.
“Buat barak maka públiku no nasionál sira presiza hatene, liuliu lamentasaun hosi komunidade presiza reforsa liután hodi espalla informasaun ba públiku hodi parte relevante sira bele tau atensaun,” Autoridade munisipál ne’e hateten ba Agência Tatoli, iha ninia knaar fatin, administrasaun munisípiu Viqueque, kinta ne’e.
Notísia relevante: Administradór prontu identifika rai instala sede Agência Tatoli, I.P iha Viqueque
Sujestaun ne’e nia hato’o relasiona ho aniversáriu Agência Tatoli, I.P ba da-VI iha loron 27 jullu 2022.
“Ha’u hanoin durante ne’e kobre ona parte balun, maibé balun seidauk kobre hotu. Tanba ne’e, Agência Tatoli presiza reforsa liután hodi fatin sira ne’ebé maka seidauk kobre bele kontinua kobre hodi rekolla informasaun ba públiku no governante sira bele hatene,” nia akresenta.
Administradór konsidera, liuhosi informasaun maka ema bele hatene kestaun balun no tau-atensaun, henesan problema setór agrikultór no setór seluk, tanba munisípiu Viqueque maioria moris ho atividade agrikultura.
“Entaun liuhosi informasaun, bainhira irrigasaun ruma a’at, parte relevante bele tau-atensaun lais, tanba ne’e mídia nia serbisu iha munisípiu importante tebes. Ha’u hanoin ba futuru presiza promove nafatin setór agrikutura, turizmu no indústria iha munisípiu Viqueque, tanba setór sira-ne’e maka presiza fó sai ba públiku,” nia sujere.
Aleinde ne’e, autoridade munisipál mós nota katak durante ne’e Agência Tatoli, I.P sempre marka prezensa halo kobertura ba atividade importante sira iha Viqueque.
“Agência Tatoli sempre marka presenza, ida-ne’e ha’u sente hatudu pasu pozitivu tebes hanesan mídia estatál. Ha’u agradese tanba durante ne’e halo ona esforsu hodi espalla informasaun ba públiku hodi akompaña informasaun kredível liuhosi portál. Durante prezensa Agência Tatoli iha Viqueque, ha’u sempre kolabora serbisu no bainhira ha’u ba fatin ruma, sempre bolu jornalista la’o hamutuk ho ha’u-nia kareta. Tanba sira-nia presenza hodi rekolla informasaun hodi fó sai ba públiku. Tanba ne’e, ha’u sente prezensa mídia importante iha munisípiu,” Administradór tenik.
Antes ne’e, iha loron 27 maiu 2021, Konsellu Diretivu Agência Tatoli, I.P destaka jornalista lima ba munisípiu lima hanesan Viqueque, Baucau, Covalima, Bobonaro no Rejiaun Administrativa Espesiál Oé-cusse Ambeno (RAEOA) hodi halo kobertura ba atividade sira no preokupasaun iha munisípiu.
Agência Tatoli, I.P sai fonte informasaun ofisiál liuhosi produsaun informasaun ba públiku ho eskala nasionál, rejionál no internasionál, ho karakter multikanál, multimédia, multiplataforma no multitarefa.
Jornalista : Vitorino Lopes da Costa
Editora : Julia Chatarina
