ANAAA identifika kursu 20 preparadu tuir avaliasaun programátiku
DILI, 21 jullu 2022 (TATOLI)–Ajénsia Nasionál Avaliasaun Akreditasaun Akadémiku (ANAAA) rejista tan programa estudu 30 resin atu tuir avaliasaun akreditasaun programátiku iha tinan ne’e, maibé iha kursu 20 resin maka iha ona preparasaun atu tuir avaliasaun.
“Ami haree programa estudu hamutuk 20 resin maka iha ona preparasaun tuir avaliasaun akreditasaun programátiku tinan 2022. Ami fiar agostu no setembru númeru ne’e bele aumenta, maibé depende ba kolega sira hosi instituisaun ka universidade atu prepara didi’ak relatóriu,” Diretór Ezekutivu ANAAA, Edmundo Viegas, informa iha edifísiu ANAAA, Balide, kinta ne’e.
Notísia relevante: MESSK seidauk públika rezultadu avaliasaun kursu 25 hosi ANAAA
Avaliasaun ne’e depende ba kada programa estudu sira ne’ebé iha ona prontidaun atu halo prosesu akreditasaun programátiku iha tinan 2022.
Programa estudu 30 resin ne’ebé atu tuir avaliasaun maka preparadu ona no tenke aprezenta uluk relatóriu auto avaliasaun ne’ebé sei prienxe iha formatu.
“Kritériu ida tanba hosi prosesu akompañamentu ANAAA durante fulan-neen ba kotuk, haree iha kursu lubuk ida maka hatama ona relatóriu auto avaliasaun no iha programa estudu balun maka iha ona preparasaun di’ak atu partisipa iha avaliasaun programátiku,” nia akresenta.
Hosi formatu ne’ebé ANAAA prepara, iha padraun 10 ho indikadór 108 maka kada kursu sira tenke hato’o informasaun, hahú hosi mehi instituisaun ka kursu ida ninia vizaun no misaun, hafoin kada kursu ka programa tenke hato’o área atuasaun, karik programa akadémiku sira tenke aprezenta mós nível saida maka eziste baxarelatu, lisensiatura ka mestradu.
Nune’e mós, kona-ba kurríkulu tenke klaru atu nune’e to’o remata tenke hetan mós rezultadu aprendizajen.
“Bainhira estudante sira foti kursu enjeñaria to’o ramata, matenek saida mak sira hetan. Tanba ne’e iha formatu ne’e husu mós kualidade mestre sira ne’ebé hanorin iha kursu ne’e inklui kada tinan estudante sira, tama hira, gradua hira, no na’in hira mak hetan ona serbisu. Aleinde ne’e, kona-ba infraestrutura ne’ebé iha relasaun ho prosesu hanorin no apreende iha sala aula, biblioteka no laboratóriu hafoin sei husu mós kona-ba edifísiu, terrenu no fundu kapitál,” nia tenik.
Indikadór 108 ne’ebé ANAAA husu ba kursu ka programa estudu sira tenke prienxe ne’e la’ós foin maka hala’o iha tinan ne’e, maibé introdús kedan hosi tinan 2016, ne’ebé tinan ne’e ANAAA konsege halo ona avaliasaun ba da-VI.
Diretór ANAAA haktuir, iha fulan hirak liubá iha primeiru trimestrál ne’e sira mós halo preparasaun ba Instituisaun Ensinu Superiór foun haat atu tuir avaliasaun akreditasaun institusionál hanesan kada tinan ajénsia halo.
Instituisaun Ensinu Superiór foun haat ne’ebé atu tuir avaliasaun akreditasaun maka Institutu Politékniku Betano (IPB), Institutu São João de Brito (ISJB), Institutu Boaventura Timor-Leste (IBTL) no Institutu João Saldanha (IJS).
“Ami konsidera Institutu haat ne’e foun tanba sira foin maka hetan lisensa operasionál formál iha tinan 2020. Instituisaun haat ne’e tama ona tinan-rua ezisténsia, tanba ne’e sira iha obrigasaun tenke prepara-an atu tuir akreditasaun institusionál ba dahuluk. Tanba ne’e durante fulan-neen ba kotuk ANAAA halo preparasaun ba institutu haat ne’e hodi akompaña sira prienxe formatu auto avaliasaun ne’e ho didi’ak,” nia tenik.
Jornalista : Tomé Amado
Editora : Julia Chatarina
