iklan

EDUKASAUN, HEADLINE

Mercy Corps entrega ekipamentu SAR-EWS ba SEPC, IPG no DNMG

Mercy Corps entrega ekipamentu SAR-EWS ba SEPC, IPG no DNMG

Ekipamentu SAR

DILI, 21 jullu 2022 (TATOLI)-Mercy Corps liuhusi programa PREPARADU finansia husi Ajénsia kooperasaun internasionál Korea (KOICA, sigla inglés), ofisialmente, entrega ekipamentu SAR (save and rescue) ka Salva no Buska hanesan Jaket, Luvas, Sapatu, Kapasete no Tali salva vida nian inklui ekipamentu monitorizasaun EWS (Early warning system) ka Sistema alerta sedu hanesan Monitór, ba Sekretáriu Estadu protesaun sívil (SEPC, sigla portugés), IPG (Institutu petróleu no jeolojia), Protesaun sívil (PS) no Diresaun nasionál meterolojia no jeofízika (DNMG, sigla portugés), ho objetivu iha Salaun Luz Clarita, kinta ne’e.

Objetivu husi ekipamentu Salva no Buska  ne’e ajuda ekipa sira karik mosu dezastre ruma no objetivu husi Monitór, desktop ida mak atu akumula dadus sira ne’ebé mai husi data-loger hodi analiza dadus sira ne’e, hodi bele fó sai ba públiku.

Ekipamentu SAR-EWS  ne’ebé Mercy Corps entrega ne’e ho valór$25.000,00

“Harii komunidade ida ne’ebé prontu hasoru dezastre ne’e hanesan pilar ba estratejia Mercy Corps nian. Durante ne’e Mercy Corps servisu hamutuk ho protesaun sivíl liu tinan ualu nia laran hodi ajuda komunidade sira prepara aan hasoru dezastre,” Country Director Julles Keane hateten iha diskursu iha ámbitu serimónia entre ekipamentu salva vida iha Salaun Luz Clarita, Dili, kinta ne’e.

Ezekutivu ne’e akresenta, atu hadi’a dezafiu sira ne’ebé komunidade hasoru, Daudaun ne’e, Mercy Corps serbisu iha Timor-Leste foku liu iha Dili, Ainaro, Ermera, Covalima no área rural sira hodi prepara komunidade nom ós ekipa responde dahuluk nian prontu hasoru dezastre.

“Mercy Corps kontenti tebe-tebes bele serbisu hamutuk ho parseria sira hotu iha komitmentu atu nafatin serbisu hamutuk hodi harii komunidade ida ne’ebé prontu hasoru dezastre iha Timor-Leste”.

Iha sorin seluk, reprezentante Sekretariadu Protesaun Sívíl, Prezidenti Protesaun Sivíl, Ismael Babo husu atu kuidadu didi’ak ekipamentu ne’ebé organizasaun lider globál ne’e oferese ona.

“Lori protesaun sivíl nia naran tomak hato’o hela ba ita hotu katak ekipamentu doasaun ne’ebé mak fó apoiu ba ita, ita tenki asegura hanesan ita mak na’in rasik ba ekipamentus hirak ne’e,” nia husu.

Nia mós husu autóridade lokál sira hotu atu serbisu hamutuk ho komunidade asegura nafatin sistema alerta ne’ebé instala ona iha Xefe Suku sira-nia aredór sira.“Kontrolu ka tau-matan hela ba para ita -ia alin, ita nia joven sira labele estragu”.

Nia agradese mós autoridade relevansia sira no ba organizasaun Mercy Corps no husu mós atu kontinua serbisu hamutuk ba futuru Timor-Leste nian ne’ebé di’ak.

“Lori Ministériu Interiór, sekretáriadu Protesaun Sivíl nia fatin hato’o agradese ba IPG, Metodolojia, nai Xefe Suku sira hotu faz parte importante ida husi Protesaun Sivíl nian ne’ebé ita forsa nafatin, ita prepara nafatin meiu saida mak ita iha husi ita -ia parseiru sira ne’e atu garantia ita responde dezafiu, dezastre ne’ebé sei mosu mai,”  Prezidenti Protesaun Sivíl, Ismael Babo agradese.

“Obrigadu ba Mercy Corps i ha’u husu nafatin ita-bo’ot sira-nia kooperasaun labele iha de’it eventu iha Dili maibé alarga tan ba munisípiu sira seluk tan,” nia hakotu.

Xefe Suku Bemori agradese

Xefe Suku Bemori, Cristalina Perreira Soares de Oliveira   agradese ba Mercy Corps tanba fó ona formasaun salva no buska, iha 2020 no 2021 ba komunidade Bemori hamutuk 25.

Xefe Suku Bemori, Cristalina Perreira Soares de Oliveira . Imajen Tatoli

“Agora foin atu kontinua fali agora mak realiza tan ba dala tolu ona, tuir loloos realiza semana ne’e mas prontu semana oin mak realiza, formasaun ne’e durasaun loron rua,” Xefe Suku Cristalina Perreira Soares de Oliveira   ba Tatoli iha marjen serimónia entrega ekipamentu  SAR no EWS husi Mercy Corps  ba IPG,  PS no DNMG.

Autoridade lokál ne’e mós sente kontenti ho formasaun refere. “Ami kontenti tanba sira fó matéria ne’ebé maka di’ak tebes ba ami-nia komunidade, ami-nia joven sira ami-nia Xefe Aldeia, no Xefe Suku sira, ha’u rasik,” nia haktuir.

Xefe suku Bemori ne’e mós rekoñese katak Mercy Corps serbisu di’ak tebes ho Bombeiru sira no Kruz Vermella Timor-Leste (CVTL, sigla portugés) tanba bele to’o sira-nia fatin hodi oferese formasaun ne’e ba sira.

Maske nune’e, husu atu Mercy Corps apoi mós ekipamentu seluk hanesan uza ba tesi ai, atu ajuda ninia suku karik mosu dezsatre naturál. “Nu’udar Xefe Suku, ha’u hakarak fó hanoin de’it ba sira, ami presiza makina tesi ai ninian . Ami presiza ida, tau iha ne’ebá (sede suku-red)”.

“Karik iha dezastre ruma, ami bele ho lalais responde ai ruma ka buat ruma monu iha ami-nia suku,” nia hatutan.

Simu sertifikadu

Iha biban hanesan, komunidade suku idaidak reprezenta husi sira-nia Xefe suku simu mós sertifikadu formasaun formandu sira nian husi Mercy Corps ba atividade ne’ebé komunidade kada suku tuir ona maibé antes ne’e treinadór sira mak simu uluk sertifikadu.

Entretantu, Xefe Suku sira ne’e mai husi suku sira iha munisípiu Dili, suku sira mak hanesan Bemori, Santa Crus, Colmera, Kulu-hun, Kampun Alor, Motael, Bidau Akadiru-hun, Bidau Sant’Ana, Caicoli, Fatuhada, Bairro-pité, Mascarenhas, Comoro, Bidau Lecidere, Vila-Verde.

Nune’e mós partisipante sira husi Diresaun Obras Públiku, DNMG, husi IPG, Sekretáriadu Protesaun Sivíl, bombeiru, Sekretáriadu Estadu Meiu Ambiente, CARE, World Vision, Oxfam, Caritas, KOICA, Permatil (Permakultura Timor-Leste), RHTO (Ra’es Hadomi Timoroan).

Jornalista: José Belarmino de Sá

Editór: Rafy Belo

iklan
iklan

Leave a Reply

iklan
error: Content is protected !!