VIQUEQUE, 25 jullu 2022 (TATOLI)-–Koordenadór Protesaun Sivil munisípiu Viqueque, Cerilo Soares Gomes, informa, ahi-han komunidade nia uma ida iha aldeia Naeboruk, suku Uma-uain kraik, postu administrativu Viqueque, munisípiu Viqueque, sábadu (23/07).
“Ami halo ona verifikasaun ba uma ne’ebé ahi-han no identifika katak tanba ahi eletrisidade han uluk hosi uma nia kakuluk maka to’o uma laran,” Koordenadór informa ba Agência Tatoli, iha Viqueque vila, segunda ne’e.
Notísia relevante: Ahi-han mutuk inan-faluk Martina nia uma bainhira ezerse direitu votu
Ho akontesimentu ne’e, halo sasán uma-laran oituan de’it mak konsege salva, maibé sasán balun la konsege salva tanba ahi-han uma tomak.
“Protesaun Sivil fó ona apoiu emerjénsia ba vítima hodi aguenta moris tanba ahi-han vítima nia uma. Apoia ermerjénsia kompostu hosi foos, supermi, biskuit, lona no sasán sira seluk tan,” nia akresenta.
Jornalista : Vitorino Lopes da Costa
Editora : Julia Chatarina
