EKONOMIA, HEADLINE, MUNISÍPIU, OÉ-CUSSE (RAEOA)

Notariadu RAEOA hatama reseita rihun $22-resin iha trimestre daruak

Notariadu RAEOA hatama reseita rihun $22-resin iha trimestre daruak

Diretór Rejionál Rejistu Sívil Notariadu Konservatória RAEOA, José Ase Neno Colo. Imajen TATOLI/Abílio Elo Nini.

OÉ-CUSSE, 25 jullu 2022 (TATOLI) – Iha trimestre daruak hahú hosi janeiru to’o juñu inklui fulan-jullu tinan ne’e, Diresaun Rejionál  Konzervatóriu Rejistu Sivíl Notariádu, Rejiaun Administrativa Espesiál Oé-Cusse Ambeno (RAEOA), rekolla reseita ba kofre estadu rihun $22,625.

“Iha janeiru to’o ohin ita rekolla ona pasaporte hamutuk 378 komposta hosi pasaporte serbisu no komún. Hosi númeru ne’e balun hasai ho tempu normál selu tasa $50, balu $75 no $100, ne’ebé hosi totál ida-ne’e ita hatama taxa ba kofre estadu hamutuk rihun $22,625,” Diretór Rejistu Sivíl Notariádu Oé-Cusse, José Ase Neno Colo, ko’alia iha nia kna’ar-fatin, Santa Rosa, Oé-Cusse, segunda ne’e.

Tuir nia, rezultadu reseita ne’e fulan neen hosi janeiru to’o juñu, inklui jullu data ohin, tanba iha jullu aplikante barak-liu mak trata pasaporte, tanba sedauk kompleta fulan ida, ema kuaze 100 mak mai trata ona, espera katak iha agostu aplikante sei barak.

Nia informa, difikuldade  rejistu sivíl notariádu Oé-Cusse Enfrenta iha durante atendimentu trata dokumentu maka bainhira atu foti dokumentu transporte iha prosesu burokrasia, tanba dokumentu ne’e tenke haruka ba nasionál halo emisaun, tanba ema selu $50 nia durasaun atu foti tenke loron 10, depois sira-ne’ebé selu $75 tenke foti iha loron tolu no selu $100 tenke foti kedas iha 24 oras nia laran.

“Maibé labele tanba ida-ne’e maka difikuldade ami hasoru, tanba tuir loloos ami mak foti iha Dili atu fó ba aplikante sira, maibé dalaruma problema transporte ba mai depois prosesu burokrasia, ita tenke hatama pedidu ba autoridade, kuandu autoriza mak ita-bele ba,” nia afirma.

Maske nune’e, parte notariadu sempre buka mekanizmu ho solusaun seluk, komunika ho aplikante-sira, karik família ruma iha Dili manda invoice ba, mak família sira bele direita foti iha nasionál, hotu tiha bele haruka liuhosi transporte ró ka aviaun mai Oé-Cusse.

“Ne’e hanesan meiu solusaun ida, durante ne’e ita komunika ho aplikan-sira, tanba opsaun ne’e maka fasílita prosesu ho lais, maibé kuandu hein ami entaun prosesu sei naruk,” nia katak.

Nia esplika, kompeténsia labele desentraliza iha rejiaun, tanba bazea diploma ministeriál hatete, pasa hotu tenke hetan asinatura hosi diretór notariádu nasionál, maibé polítika ba oin bele deskonsentra ba iha munisípiu atu prosesu iha munisipál, maibé emisaun asinatura ne’e tenke diretór nasionál atu kontrola hodi evita falsifikasaun.

Tuir nia observasaun, maske buat hotu konsentra iha nasionál maibé durante iha prosesu tratamentu, aplikante sira mós iha koñesimentu kona-bá problema ne’e, tanba geografikamente Oé-Cusse ho Dili dook tebes, tanba molok mai halo tratamentu ba pasapórte parte notariadu mós esplika kedas difikuldade ne’e.

Nia informa, taxa hosi notariadu sei bootliu tinan kotuk, kompara ho tinan kotuk taxa tún maka’as tanba situasaun COVID-19, movimentasaun sidadaun ladún sai ba rai-li’ur.

Notísia relevante: Fasilidade atendimentu iha Rejistu Sívil Notariadu RAEOA presiza manutensaun

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!