DILI, 25 jullu 2022 (TATOLI)—Diretór Ezekutivu Raes Hadomi Timoroan (RHTO), Joãozito dos Santos, hateten iha futuru Agência TATOLI kontinua servisu makaas no mellora produtu TATOLI nian liu-liu sai lian ba lian laek sira-nia lian.
Notísia Relevante: Bankada PLP husu Agência TATOLI tenke sai mídia krítiku-independente
“Iha aniversáriu ba dala neen (6) ne’e, espera katak iha futuru Agência TATOLI bele sai nafatin lian ba ema hotu, lian ba lian laek sira, lian ba inkluzaun no asegura ema hotu-hotu nia lian, nune’e bele hariku no prezerva liután Agência TATOLI nia servisu,” Joãozito dos Santos hateten ba Agência TATOLI, iha nia kna’ar fatin RHTO, Balide, Dili.
Nia fiar katak Agência TATOLI hola parte iha prosesu dezenvolvimentu iha Timor-Leste no bele sai referénsia ba mídia sira seluk.
“Agência TATOLI tenke sai ezemplu no referénsia ba mídia sira seluk iha Timor-Leste tanba durante ne’e fó sai informasaun ne’ebé kredivél no transparánsia,” nia dehan.
Nune’e, nia hato’o parabéns ba Agência TATOLI ne’ebé atu selebra aniversáriu ba dala-neen (6) ne’e fó sai notísia ne’ebé transparánsia, kredivél ba ema hotu-hotu liu-liu EhD sira iha Timor-Leste.
Notísia Relevante: PR Horta enkoraja TATOLI kontinua públika informasaun loos ba públiku
Jornalista : Osória Marques
Editór : Cancio Ximenes
