HEADLINE, SEGURANSA

PNTL Dili hahú hasai karreta aat estasiona iha estrada públiku

PNTL Dili hahú hasai karreta aat estasiona iha estrada públiku

Komandu PNTL liuhosi Unidade Tránzitu Munisípiu Dili, tersa (26/7), hala’o operasaun hodi hasai obrigatóriu karreta avaria sira ne’ebé estasiona iha estrada kapitál Dili. Imajen/ Natalino Costa

DILI, 26 jullu 2022 (TATOLI)— Komandu Polísia Nasionál Timor-Leste (PNTL), liuhosi Unidade Tránzitu Munisípiu Dili, tersa (26/7), hahú hala’o operasaun atu hasai obrigatóriu karreta avaria sira ne’ebé estasiona kleur iha estrada kapitál Dili.

“Atividade ida ne’e relasiona ho karreta saukata sira ne’ebe ita nia komunidade sira laiha responsabilidade soe hela iha estrada publiku no ohin ita foti iha fatin rua, ida iha area Vila-Verde no ida iha ne’e”, deklara Komandante, Unidade Tránzitu Dili, Inspetor Polisia Domingos Sarmento Gama ba Jornalista sira iha Bairo Central, tersa ne’e.

Ekipa Unidade Tránzitu Munisípiu Dili hala’o operasaun ba karreta aat rua ne’ebé na’in-sira abandona ka estasiona iha área Vila-Verde nian besik edifísiu Ministériu Interiór no área Lecidere besik edifísiu SVD nian.

Nia dehan, estrada públiku ne’e estadu nian no estadu maka povu entaun povu presiza livre halo hodi hala’o movimentu no sirkulasaun via públika.

Tanba Tuir lei kodigu estrada kuandu komunidade sira uza estrada públiku sai fali fatin privadu ne’e kontra ona  Dekretu-lei númeru 6/2003, 3 abríL kona-ba kódigu Estrada ne’ebé presvistu  iha artigu 49 no 50, katak, sidadaun sira labele halo estasionamentu ka para veíkulu iha estrada públiku.

“Preokupasaun ne’e mai hosi komunidade sira no Governu rasik entaun Komandu Jerál PNTL hatun diretiva ba Komandu PNTL Munisípiu Dili no delega fali orden mai Tránzitu Dili hodi implementa hasai karreta aat sira ne’e,” nia afirma.

Atu hasai karreta aat sira iha Kapital Dili ne’e fasil, maibe problema maka falta ekipamentu pezadu hanesan tronton hodi tula sai karreta aat sira ne’e. Ho difikuldade hirak ne’e iha semana kotuk halo pedidu ba Patrimóniu Estadu hodi fasilita ekipa pezadu, nune’e ohin, realiza duni.

Domingos Gama hateten, karreta aat iha Dili laran ne’e nia parte identifika hotu ona no husu ba komunidade sira ne’ebé abandona karreta aat atu ho konsiénsia muda sai ba fatin propriu hanesan areadór privadu no ofisina.

Nune’e, nia apela ba komunidade sira iha kapitál Dili, ne’ebé na’in ba karreta ka motorizada ne’ebé aat ona labele hapara fali iha estrada públiku tanba estrada ne’e livre ba komunidade halo movimentasaun.

“Ita husu ba komunidade sira iha kapitál Dili, se ita sente nasaun RDTL ne’e ita nian, ema ida la obriga ita atu muda sasan sira ne’ebe konsidera hanesan lixu,” nia sujere.

Komandante ne’e hateten, karreta sira ne’ebé prende hosi komunidade sira iha estrada públiku sei selu multa másimu hodi selu koima ho osan montante $120

“Entaun ohin ita husu ba karreta nain sira iha loron 90 tenke kumpre sira nia dever ba selu multa $120, hodi foti fali karreta, maibe liu ona deit loron ida iha loron 90 nia laran maka sira lakon ona direitu hanesan nain no sasan ne’e nakfilak an ba patrimóniu Estadu,” afirma.

Daudaun, PNTL sei foka ba karreta sira ne’ebé para ka estasiona iha estrada protokolu no iha loron tuir mai nia parte kontinua koordena ho Patrimóniu Estadu hodi halo operasaun ba karreta aat sira ne’ebé abandona iha kada bairru.

Biban ne’e, Domingos Gama mós husu ba parte Dirasaun Nasionál Transporte no Terrestre (DNTT), atu halo inspesaun ba viatura sira ne’e nia kondisaun la permite ka latuir kritéria tenke halo alterasaun hodi labele hetan lisensa sirkulasaun.

Notísia relevante:  PNTL Dili sei hasai karreta aat estasiona iha estrada públiku

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!