HEADLINE, JUSTISA

MJ fó pose ba Defensór Públiku nain-tolu

MJ fó pose ba Defensór Públiku nain-tolu

Ministru Justisa, Tiago Amaral Sarmento. Imajen Tatoli/Francisco Sony

DILI, 28 jullu 2022 (TATOLI)- Ministru Justisa (MJ), Tiago Amaral Sarmento , akompañadu hosi Defensória Públika Jerál Cancio Xavier, kinta ne’e, fó pose ba Defensór Públiku nain tolu  hodi responsavél servisu Defensória Públika nian iha Munisipiu Covalima no Baucau inklui Rejiaun Administrativu Espesiál Oé-cusse no Ambeno (RAEOA).

Defensór Públiku nain-tolu nomeia liuhosi Reuniaun Konsellu Superiór Defensória Públika nian ho baze artigu 35 alinea a,c,d no artigu 38 númeru 4 no artigu 92  hosi Dekretu-Lei númeru. 10/2017 ba Estatutu Defensoria Públika.

Defesór Públika ne’ebé simu toma pose mak hanesan  Defensora Laura Valente Lay, ho karreira profissionál atuál Defensora Públika ho eskalaun B ne’ebé ezerse funsaun hanesan Defensora Públika responsável iha Defensoria Públika Munisipál Baukau hodi subtitui Defensór Públiku, Gregório Maria Lourdes de Lima.

Defensór Públiku Jonas Henrique da Costa, ho karreira profisionál atuál Defensór Públiku  segundu klase ho eskalaun A, ezerse funsaun hanesan Defensor Públiku responsável ba Defensoria Públika Munisipál Covalima, ne’ebé subtitui Defensór Publiku, Manuel Amaral.

Defensór Afonso Gomes Fátima, ho karreira profisionál atuál Defensor Públiku segundu  klase, ho eskalaun A, ezerse funsaun hanesan Defensor Públiku responsável ba Defensoria Públika RAEOA, ne’ebé subtitui Defensor Públiku, Calisto Totu ne’ebé nia mandatu ramata ona.

Ho nune’e, Ministru Justisa, Tiago Amaral Sarmento, hateten nomeasaun ba iha Defensória Públika ne’e importante atu bele responde ba atendimentu kazu sira iha munisipiu.

“Parabéns ba emposadu sira no husu atu halo kna’ar ho di’ak tuir lei haruka hodi fó asisténsia  jurídika ba ita nia komunidade sira ne’ebé presiza justisa,” Governante ne’e  afirma iha iha Salaun Sentru Formasaun Jurídika no Judisiáriu Caicoli, kinta ne’e.

VIII Governu Konstitusionál liuhosi Ministériu Justisa esforsu buka hodi kontinua investe iha área rekursu umanu liuliu atu haforsa serbisu Defesória Públika  iha munisipiu sira nian tuir ezijénsia lei organizasaun judisiáriu.

Iha fatin hanesan, Defesoria Públika Jerál, Cancio Xavier, sente haksolok ho nomesaun ne’e tanba bele aumenta rekursu hodi fo asisténsia jurídika no judisiáriu ba públiku liuliu iha área Defonsória Públiku nian.

“Maske durante ne’e ita hetan reklamasun barak ne’ebé levanta husi populasun, maibé ha’u hanoin la nesesariu atu resposta ba kestaun sira ne’e,” nia afirma.

Tanba ne’e, resposavél ne’e kongratula no parabeniza emposadu atu hala’o servisu hodi fó asisténsia no garante justisa ba públiku tomak ne’ebé persiza tulun.

Entretantu, Emposadu Responsavél Defensoria Públiku iha Munisipiu Covalima, Defesór Jonas Hendrique da Costa, sente haksolok ho nomesaun ne’e no kompromete atu asume resposabilidade ne’e ho di’ak hodi garante justisa ba ema hotu iha munisípiu Covalima.

Entertantu seremonia toma pose ba Defensór Públiku nain tolu ne’e, hetan partisipasaun hosi, Prezidente Tribunál Rekursu, Deolindo dos Santos, Prokuradór Jerál Repúblika (PJR), Alfonso Lopes, Vise Ministru Justisa, Sekretáriu Estadu Terra no Propriadade no kovidadu sira seluk.

Jornalista: Natalino Costa

Editór      : Florencio Miranda Ximenes  

iklan
iklan

Leave a Reply

iklan
error: Content is protected !!