Agência TATOLI presiza atualiza an ba téknolojia
DILI, 29 jullu 2022 (TATOLI)—Eis Prezidente Agência TATOLI, Institutu Públiku (TATOLI, I.P), José da Costa, hateten Agência TATOLI, Institutu Públiku, presiza atualiza an ba teknolojia, nune’e presiza funsiona tuir evolusaun téknolojia ne’ebé daudaun ne’e la’o.
Notísia Relevante: MAPKOMS husu TATOLI públika informasaun lais, loloos no kredivél
“Agência TATOLI, Institutu Públiku, presiza atualiza an ba teknolojia, nune’e presiza funsiona tuir evolusaun téknolojia,” José da Costa hato’o lia hirak ne’e bainhira sai oradór ba semináriu ho tema “Reforsa papél TATOLI, I.P hodi hasa’e kuiñesimentu públiku ba domina siénsia no teknolojia liu hosi informasaun”, hodi komemora aniversáriu ezisténsia Agência TATOLI ba dala-VI iha edifísiu TATOLI, Faról, Dili, sesta ne’e.
Eis prezidente TATOLI ne’e ko’alia kona-ba ita prosesu bolu embriaun ba Instituisaun Públika, agora instituisaun públika ne’e ninia dezáfiu halo nusa, maibé nia parte hakarak koloka pontu tolu bele refleta liu-liu ba TATOLI atu bele hanoin.
Hanesan dezáfiu dahuluk mak públiku nia espetativa ne’e boot liu fali dalaruma kapasidade ne’ebé TATOLI iha no públiku hakarak notísia sira-ne’ebé kredivel no lalais, agora públiku nia espetativa so provadu ho satisfasaun ne’ebé públiku hetan liuhosi informasaun sira ne’ebé prodús, no espetativa ida-ne’e muda loro-loron tanba ohin nia kontente tiha aban lae, ida-ne’e dezáfiu ne’ebé nunka para.
“Tan ne’e públiku nia interese ne’e mak ita tenke hanoin, tuir opiniaun karik husik hela TATOLI hanoin oinsá bele jere no maneja inteerese ida ne’e. No klaru katak mantein ita-nia misaun no dalan, maneira ita halo ita-nia servisu hanesan Agência Noticiosa mantein,” nia hataten.
Dezafiu daruak, mak klaru hosi Governu tanba aloka orsamentu kada tinan hodi investe hela osan, klaru nia iha dezeju ida atu hetan out put ida ba investimentu ne’ebé nia halo, entaun ezije kualidade hosi Governu dalaruma kualidade tuir indikadór ne’ebé hanoin klaru ne’e la hanesan ho intervensaun ho buat seluk.
Ho orsamentu ne’ebé Governu tau ba TATOLI saida mak hetan tanba Governu hanesan hetan hosi públiku nia espetativa sira, tanba maneira Governu jere hela públiku nia espetativa no Governu nia informasaun sira-ne’ebé Estadu hanoin katak povu tenke asesu.
“Dezáfiu datoluk, mak mudansa tempu situasaun agora. Ha’u hanoin ita hotu-hotu asesu hanesan kolega jornalista sira hatene uluk ita-boot sira ho telefone agora karik ho lap top ona no uluk hasai retratu ho telefone agora karik ho kámera, maibé karik ne’e seida’uk to’o tanba espetativa ida atualiza ho tempu ne’e parese oin seluk uitoan ona ho agora,” nia dehan.
Entaun, nia dehan, saida mak TATOLI hanoin tenke halo mak oinsá jere ita-nia an depois kontinua relevante iha kontextu ne’ebé iha, sei relevante ka lae ba tempu ida agora. Karik hanesan husik hela autoridade sira iha ne’e, lideransa TATOLI nian karik kontinua hanoin dezáfia an hodi kontinua eziste bele sente situasaun ne’ebé iha TATOLI mós iha labele hela nafatin iha kotuk.
“Tanba ne’e liga ba asuntu téknolojia no siénsia, ha’u hakarak husik hela de’it mensajen ida importante iha ne’e. Se ita la kongese kompete, ita lakon. Ita la konsege atualiza ita-nia an ho téknolojia ita lakon ita hela iha kotuk hela. Atu dehan katak, forma rekursu ne’ebé ita iha tenke lori ita-nia an hodi aprende dezáfiu sira-ne’ebé hale’u ita hodi transforma ba oportunidade depois tau ita-nia an ba oin,” nia hateten.
Nune’e, reflesaun id akatak TATOLI kontinua mosu iha situasaun hotu sempre hanoin transforma dezafiu ba oportunidade hodi la’o ba oin iha Timor-Leste.
Notísia Relevante: Nélio Isaac dezafia produtu Agência Tatoli, I.P foka ba asuntu turizmu
Jornalista : Nelson de Sousa
Editór : Cancio Ximenes
