HEADLINE, INKLUZAUN SOSIÁL, NASIONÁL, POLÍTIKA

Nélio Isaac dezafia produtu Agência Tatoli, I.P foka ba asuntu turizmu

Nélio Isaac dezafia produtu Agência Tatoli, I.P foka ba asuntu turizmu

DILI, 29 jullu 2022 (TATOLI)Eis Sekretáriu Estadu Komunikasaun Sosiál (SEKOMS), Nélio Isaac Sarmento, dezafia produtu Agência Noticiosa de Timor-Leste-Tatoli, Institutu Públiku (Agência Tatoli, I.P) foka ba asuntu turizmu.

“Tanba sá mak to’o oras ne’e produtu Tatoli ne’e mídia nasionál ka internasionál sira seidauk foti atu sai hanesan referénsia ba sira-nia notísia. Tatoli mak nu’udar embaixadór ne’ebé iha informasaun atu fahe kondisaun realidade Timor nian ba mundu tanba ne’e maka produtu Tatoli tenki foka ba asuntu sira hanesan turizmu hodi nune’e dada investidór mai Timor,” Eis SEKOMS hateten bainhira sai oradór iha semináriu ne’ebé realiza iha ámbitu aniversáriu Agência Tatoli, I.P ba da-VI ho tema ‘Reforsa Papel Tatoli hodi Hasa’e Koñesementu Públiku ba Domina Siénsia no Teknolojia liuhosi Informasaun’.

Notísia relevante: Nélio Isaac enkoraja Agência TATOLI kontribui informasaun ba públiku no Governu

Pioneiru Agência Tatoli ne’e konsidera, produtu mídia estatál ne’e tenki sai hanesan arkivu ka dokumentasaun ne’ebé Estadu presiza iha aban bainrua inklui ba estudante sira ne’ebé hakarak halo peskiza ruma, hodi foti dadus.

“Agência notisioza tenke fó informasaun Estadu nian, entaun momentu ne’e ita iha sistema ida ita atu kria, mak unidade informasaun ne’e katak to’o iha munisípiu sira ne’e iha sira-nia servisu komunikasaun nian, informasaun sira iha munisípiu ne’e tama iha unidade ida kria, hafoin ida-ne’e iha ema ne’ebé atu halo selesaun nune’e informasaun sira ne’e bele sai informasaun di’ak ba sosiedade,” nia subliña.

Nia dehan, ba oin Agência Tatoli sei hasoru dezafiu, tenki iha vizaun oinseluk agora, vizaun ida katak sosiedade agora modernu no moris iha era millennium ho teknolojia informasaun ka dijitalizasaun.

“Ita-nia sosiedade agora, nia ba sosa jornál atu ba lee ne’e susar tebes, maibé agora smartphone ne’e sai tiha hanesan ema, kalan toba kama leten, ninia moris mak ho ida ne’e de’it. Ida-ne’e Agência Tatoli tenki hatene katak populasaun ninia karater moris ne’e ba ona iha área ida-ne’e, tanba ne’e maka plataforma ida dijitál online ho multimedia ne’e ita-boot sira tenki tau prioridade importante,” nia rekomenda.

Aleinde ne’e, nia haree katak dezafiu mídia Estadu ne’e nia kompetitór agora mosu barak la’ós de’it ida ka rua.

“Se Tatoli lakohi laos liu lakon ho sira, ne’ebé kompetitór mídia online agora ne’e komesa book-an, agora oinsá mak ita tama iha kompetitór sira, klaru katak presiza rekursu. Ko’alia kona-ba formasaun ne’e importante, tenki la’o ba nafatin. Ha’u konkorda tebes se ita boot sira (jornalista) portugés sira aumenta tan portuges ba,” nia tenik.

Agência Tatoli, I.P nu’udar ajénsia ofisiál Estadu Timor-Leste nian, ne’ebé ninia ezisténsia mai hosi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun hosi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.

Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.

Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).

Objetivu estabelese Agência Tatoli, I.P hodi fontes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klarez no nafatin iha integridade no mós kualidade.

Jornalista   : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!