Nélio Isaac enkoraja Agência TATOLI kontribui informasaun ba públiku no Governu
DILI, 29 jullu 2022 (TATOLI)—Eis Sekretáriu Estadu Komunikasaun Sosiál (SEKOMS), Nélio Isaac Sarmento, enkoraja jornalista Agência TATOLI atu lori mídia estatál sai mídia ne’ebé forte hodi kontribui informasaun ba públiku no ba Governu.
Notísia Relevante: MAPKOMS konsidera produtu Agência Tatoli influénsia ona públiku
“Ha’u sente katak difikuldade barak mak TATOLI sei hasoru, maibé dala ida tan ha’u enkoraja jornalista no funsionáriu hotu-hotu iha TATOLI atu sai mídia ne’ebé forte nune’e kontribui infromasaun ba sidadaun no ba ita-nia Governu rasik. Ita la’ós inimigu ba Governu maibé ita sai parseiru ne’ebé atu lori ita-nia Estadu ba buat ne’ebé loos,” Eis SEKOMS, Nélio Isaac Saemanto, hateten ba Agência TATOLI, iha ámbitu komemorasaun aniversáriu Tatoli ba dala-VI (27 jullu 2016-27 jullu 2022), iha Dili.
Tanba ne’e, nia dehan, ba oin jornalista ida-idak tenke profisionál iha área jornalizmu hodi fó sai informasaun ne’ebé loos, kredivél no rigor ba públiku.
“Ha’u hanoin katak TATOLI tenke fila fali orijinalidade atu sai informasaun ne’ebé neutru, kredivel, rigor iha ita-nia rain. Tuir ha’u-nia observasaun durante ne’e, TATOLI seidauk halo kontrolu di’ak ba Estadu ida-ne’e. Seidauk tanba ita-boot sira seidauk kobre sai objetivu katak ha’u-ne’e jornalista puru laiha interse, buat ne’ebé di’ak hateten di’ak no buat ne’ebé la di’ak dehan la di’ak. Ida-ne’e mak sai obstakulu iha kada profisaun jornalista nian,” Nélio hateten.
Tanba ne’e, jornalista sira presiza hadi’a no tenke hanoin ona nune’e sai parseiru ba órgaun komunikasaun sosiál sira seluk.
“Ema bele konfiansa ba produtu TATOLI ne’ebé iha, mezmu ida-ne’e klaru la’ós fasil maibé se ita iha kompromisu, ha’u sente sei iha nia rezultadu. Entaun ho ne’e, ha’u husu ba ha’u-nia alin sira-ne’ebé servisu iha mídia ne’e ka profisionál jornalista TATOLI kuandu makaas mak eleitór ne’ebé lee ita-nia informasaun sei fiar,” nia enkoraja.
Nia enkoraja jornalista TATOLI atu aprende ne’e loos maibé hadomi imi-nia profisaun, ida-ne’e mak importante, tanba prinsípiu hosi TATOLI mak oinsá sai plataforma informasaun ne’ebé reprezenta país ne’e ba iha rai-li’ur no fó transforma informasaun ne’ebé loos ba públiku.
“Durante TATOLI hamriik la’ós aat liu maibé presiza hadi’a liután, liu-liu oinsá TATOLI fó sai informasaun kredivél no sai úniku informasaun ne’ebé númeru um iha Timor-Leste, iha plataforma informasaun ne’ebé presta ba ita-nia sidadaun,” nia dehan.
“Hanesan baze infromasaun iha online, mak hanoin ona oinsá hosi produsaun ba plataforma informasaun liu-liu kona-ba áudiu, vídeo para labele komsumu interna de’it iha TATOLI maibé bele sai ona ba komunidade Internasionál liu-liu servi ita-nia komunidade timoroan ne’ebé iha rai-li’ur,” nia hatutan.
Parabéns ba TATOLI no la sente TATOLI boot daudaun ona no mídia ne’ebé hetan fiar hosi populasaun Timor-Leste.
Jornalista : Osória Marques
Editór : Cancio Ximenes
