iklan

EDUKASAUN, HEADLINE

Dosente 48 sei dezloka bá Portugal iha setembru

Dosente 48 sei dezloka bá Portugal iha setembru

Diretór Ezekutivu FDCH, Cristóvão dos Reis. Imajen Tatoli/Francisco Sony

DILI, 29 jullu 2022 (TATOLI)Dosente na’in-48 hosi Instituisaun Ensinu Superiór públiku no privadu tuir hela kursu intensivu lian portugés atu prepara dezloka bá Portugal iha fulan-setembru hodi kontinua estudu iha área programa pos-graduasaun.

“Nune’e bainhira sira kontinua estudu iha Portugal labele hasoru dezafiu,” Diretór Ezekutivu Fundu Dezenvolvimentu Kapitál Umanu (FDCH, sigla portugés), Cristóvão dos Reis, informa, foin lalais ne’e.

Notísia relevante: Ema 99.692 sai benefisiáriu programa haat FDCH durante tinan 11

Tuir Diretór, ninia parte agora trata hela dokumentu dosente na’in-48, nune’e bainhira kursu intensivu lian portugés ne’ebé sira tuir ne’e ramata bele prosesa ona sira nia viajen.

Dosente sira sei koloka iha Universidade Évora, Universidade Portu, Universidade Coimbra no Universidade Dominho.

Aleinde ne’e, sei iha mós universidade sira seluk iha Portugal ne’ebé VIII Governu presiza atu koloka tan bolsa estudu timor-oan iha ne’ebá, maibé daudaun sei iha hela prosesu nia laran, kuandu iha ona Governu sei haruka tan.

Totál orsamentu ne’ebé FDCH prevee atu apoiu bolsa estudu ba dosente na’in-48 ne’e hamutuk $400.000 resin, ne’ebé dosente sira ne’e sei estuda iha Portugal tuir área ida-idak nian.

“Ita-nia dosente sira ne’e sei foti área estudu tuir ida-idak nian, balun iha lian portugés, saúde, diretu inklui área sira seluk depende ba nesesidade universidade inklui dosente na’in-48 ne’e mai hosi instituisaun ka universidade ida-idak ne’ebé eziste iha nasaun ne’e,” nia tenik.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!